नाना पाटेकरांचा मराठी चित्रपट, तयार होऊनही 2 वर्षे प्रदर्शित झाला नाही, मात्र, नंतर बघताना लोक घाबरायचे

maaficha sakshidar

ज्येष्ठ अभिनेते नाना पाटेकर यांनी आपल्या दमदार अभिनयाने मराठी आणि हिंदी चित्रपटसृष्टीत वेगळी ओळख निर्माण केली. त्यांच्या कारकिर्दीतील अनेक भूमिका आजही प्रेक्षकांच्या स्मरणात आहेत. त्यापैकीच एक म्हणजे ‘माफीचा साक्षीदार’ हा मराठी क्राइम चित्रपट. विशेष म्हणजे, या चित्रपटाला प्रदर्शित होण्यासाठी तब्बल दोन वर्षे प्रतीक्षा करावी लागली होती.

1986 मध्ये प्रदर्शित झालेला ‘माफीचा साक्षीदार’ हा चित्रपट दत्ता भट, बिंदू देसाई, मोहन गोखले आणि नाना पाटेकर यांच्या प्रमुख भूमिका असलेला क्राइम ड्रामा चित्रपट होता. हा चित्रपट 1970 च्या दशकाच्या मध्यात पुण्यात घडलेल्या चर्चित जोशी-अभ्यंकर हत्याकांडावर आधारित होता. नाना पाटेकर यांनी या चित्रपटात सायको व्हिलनची भूमिका साकारली होती. त्यांनी ही भूमिका अत्यंत तीव्रतेने आणि प्रभावीपणे पडद्यावर उभी केली.

दोन वर्षे चित्रपट अडकून पडला

मात्र, चित्रपट तयार झाल्यानंतर त्याच्या प्रदर्शनाचा मार्ग खडतर ठरला. ‘माफीचा साक्षीदार’ तब्बल दोन वर्षे सेन्सॉर बोर्डाकडे अडकून पडला होता. चित्रपटातील काही सीनवर सेन्सॉर बोर्डाने आक्षेप घेतल्यानंतर हे प्रकरण दिल्लीतील रिव्हायझिंग कमिटीकडे पाठवण्यात आले. त्यामुळे चित्रपटाच्या प्रदर्शनाला मोठा विलंब झाला. या काळात निर्मात्यांना आर्थिक नुकसान तर सोसावे लागलेच, शिवाय चित्रपटाच्या पटकथेतही अनेक बदल करावे लागले.

नाना पाटेकरांचा आवाज काढून डबिंग करण्यात आलेला चित्रपट

या सगळ्या प्रक्रियेदरम्यान चित्रपटाच्या दिग्दर्शनातही बदल झाला. राजदत्त यांनी वैयक्तिक कारणांमुळे दिग्दर्शनाची जबाबदारी सोडली. त्यानंतर व्ही. रवींद्र यांनी चित्रपटाच्या दिग्दर्शनाची धुरा सांभाळली. काही सीन पुन्हा शूट करण्याचा निर्णय घेण्यात आला. त्यानंतर चित्रपटाला हिंदीमध्ये ‘फांसी का फंदा’ या नावाने डब करण्याचा निर्णय घेण्यात आला. विशेष म्हणजे, हिंदी आवृत्तीसाठी नाना पाटेकर यांनी स्वतः डबिंग केले नव्हते; एका डबिंग आर्टिस्टने त्यांचा आवाज दिला होता.

‘माफीचा साक्षीदार’ हा चित्रपट नाना पाटेकरांच्या सुरुवातीच्या कारकिर्दीतील महत्त्वाचा चित्रपट मानला जातो. कठीण परिस्थितीतही त्यांच्या अभिनयातील तीव्रता आणि वेगळेपणा या भूमिकेतून प्रकर्षाने जाणवतो.