Tv9 Marathi Exclusive | नितीन देसाई यांच्या ऑडिओ क्लिपमधील सर्वात महत्त्वाची माहिती

मुंबई | 3 ऑगस्ट 2023 : ज्येष्ठ कला दिग्दर्शक नितीन देसाई यांनी आपल्या कर्जत येथील एनडी स्टुडिओमध्ये स्वत:ला संपवलं. त्याच्या या टोकाच्या निर्णयामुळे कलाविश्वात मोठी पोकळी निर्माण झालीय. नितीन देसाई हे कर्जबाजारी होते. त्यांच्यावर 200 कोटींच्या पेक्षा जास्त रुपयांचं कर्ज होतं, अशी माहिती समोर येत आहे. देसाई यांनी मृत्यूआधी रेकॉर्ड केलेल्या ऑडिओमध्ये एडलवाईज कंपनीच्या व्यतिरिक्त इतर कोणावरही आरोप नाहीत. एडलवाईज कंपनीमुळे नितीन देसाई स्वतः कसे अडचणीत आले, त्यांची कशी फसवणूक झाली आणि मानसिक त्रास झाला? याचा लेखाजोखा त्यांनी ऑडिओ क्लिपमध्ये मांडलाय, अशी माहिती सूत्रांकडून मिळाली आहे.

नितीन देसाई यांनी ऑडिओ क्लिपमध्ये राज्य शासनाच्या नावे एक भावनिक आवाहन केलंय. त्यात नितीन देसाई म्हणतात, “हा स्टुडिओ मोठ्या मेहनतीने आणि अनेक स्वप्न पाहून बनवलेला आहे. आयुष्यात अनेक संकटांना तोंड देऊन त्यांच्यावरती मात करत, मी हा स्टुडिओ उभा ठेवला. आयुष्यात अनेक चढउतार आले, यश-अपयश, ती सगळी मी पचवली. माझ्या आयुष्यातील ही सर्वात मोठी संपत्ती आहे.”

नितीन देसाई यांनी एडलवाईज कंपनीच्या कार्यपद्धतीवर आक्षेप घेत काही गंभीर आरोप केले आहेत. शिवाय राज्य सरकारने हा स्टुडिओ जतन करावा. माझ्यासाठी किंवा कुटुंबियांसाठी नव्हे तर नव्या होतकरू कलाकारांसाठी त्याचा फायदा होईल, यासाठी सरकारने पाऊल उचलावे आणि स्टुडिओ स्वतःच्या ताब्यात घ्यावा, असं देसाई यांनी म्हटलंय.

होतकरू आणि मेहनती कलाकार या स्टुडिओच्या माध्यमातून घडतील. त्यामुळे संबंधित कर्ज देणाऱ्या वित्तीय संस्थेच्या ताब्यात हा स्टुडिओ दिला जाऊ नये. त्याचं जतन करावं, असं देसाई यांनी आपल्या ऑडिओ क्लिपमध्ये म्हटलंय.

देसाई यांनी बनवलेल्या त्या धनुष्यबाणाच्या प्रतिकृतीचा अर्थ काय?

“अनेक संकटांना तोंड देत मी एनडी स्टुडिओचं हे शिवधनुष्य उचललं होतं. आजवर हे शिवधनुष्य मी पेललं. मात्र आता ते कठीण जातंय. मी या संकटातून बाहेर पडण्याचा पुरेपूर प्रयत्न केला. मात्र पडू शकलो नाही. त्यामुळे आता थांबायची वेळ आलीय”, असं देसाई ऑडिओ क्लिपमध्ये म्हणाले आहेत.

कलादिग्दर्शक नितीन देसाई यांच्या रेकॉर्ड करण्यात आलेल्या ऑडिओ क्लिपमध्ये वारंवार स्टुडिओचे शिवधनुष्य मी आत्तापर्यंत पेलेलं पण आता ते कठीण जातंय, असं बोलताना दिसत आहेत. आत्महत्या करताना जिथे गळफास घेतला त्याच्याखाली बनवण्यात आलेल्या धनुष्यबाणाचा हाच अर्थ आहे का? असा सुद्धा तर्क आता काढला जातोय. धनुष्यबाणाचं टोक असलेल्या ठिकाणी त्यांनी गळफास घेऊन स्वत:ला संपवलंय.