दुसऱ्यांची खिल्ली उडवून पैसे..; रीलवरून ट्रोल करणाऱ्यांना राहुल रॉयचं सडेतोड उत्तर

‘आशिकी’ फेम अभिनेता राहुल रॉय सध्या त्याच्या  काही रील्समुळे सोशल मीडियावर चर्चेत आला आहे. या रीलमुळे त्याला प्रचंड ट्रोल केलं जातंय. एका कंटेंट क्रिएटरसोबत राहुलने हे रील्स शूट केले असून त्यावर नेटकऱ्यांनी विविध प्रतिक्रिया दिल्या आहेत. असा कोणता नाईलाज होता, ज्यामुळे असे रील्स करावे लागले, असा सवाल नेटकऱ्यांनी केला. या ट्रोलिंगवर अखेर राहुल रॉयने प्रतिक्रिया दिली आहे. इन्स्टाग्रामवर भलीमोठी पोस्ट लिहित त्याने यामागचं कारण सांगितलं आहे. किमान मी मेहनतीने पैसे कमावतोय, दुसऱ्यांनी खिल्ली उडवून नाही, असं प्रत्युत्तर त्याने ट्रोल करणाऱ्यांना दिलं आहे.

राहुल रॉयची पोस्ट-

‘मी माझं काम प्रामाणिकपणे आणि विनम्रतेने करतो. मला काही कायदेशीर प्रकरणांमध्ये पैसे द्यायचे आहेत आणि ही प्रकरणं आजची नाहीत. ही त्यावेळची आहेत, जेव्हा मला ब्रेक स्ट्रोक आला नव्हता. जर तुम्ही माझ्या साधेपणाची किंवा माझ्या समस्यांची खिल्ली उडवत असाल, ट्रोल करत असाल तर हे माझ्याबद्दल कमी आणि तुमच्याबद्दल अधिक सांगतं. जर तुम्हाला खरंच इतकी चिंता असेल तर मला एखादं चांगलं आणि योग्य काम मिळवण्यात मदत करा, जेणेकरून मी माझ्या खटल्यांचे पैसे देऊ शकेन. कमीत कमी मी मेहनत करून पैसे कमावतोय, दुसऱ्यांची खिल्ली उडवून नाही,’ अशा शब्दांत राहुलने सुनावलं.

या पोस्टमध्ये तो पुढे म्हणाला, ‘ब्रेक स्ट्रोकनंतर मला सक्रिय राहणं गरजेचं आहे. मी जोपर्यंत जिवंत आहे, तोपर्यंत मला काम करायचं आहे. यामुळे माझा मेंदू सक्रिय राहील आणि मला या जबाबदारीची जाणीव राहील की मी आजसुद्धा काम करतोय. अर्थात याने कधी कधी थोडंफार दु:ख होतं, पण तुम्ही माझं मनोबल तोडू शकत नाही.’

राहुल रॉयसोबतचे हे रील्स डॉ. वनिता घाडगे नावाच्या एका युजरने इन्स्टाग्रामवर शेअर केले आहेत. यामध्ये राहुल त्या महिलेसोबत त्याच्याच लोकप्रिय गाण्यावर अभिनय करताना दिसत आहे. या व्हिडीओमधील राहुलच्या चेहऱ्यावर स्पष्ट संकोचलेपणा दिसून येत आहे. यामध्ये एकीकडे ती महिला त्याच्या आजूबाजूला नाचतेय, फिरतेय आणि प्रेम व्यक्त करतेय, तर दुसरीकडे राहुल तिच्यासमोर एखाद्या पुतळ्यासारखा स्तब्ध आणि चेहऱ्यावर कोणत्याही हावभावाशिवाय उभा आहे.