अमिताभ बच्चन यांच्यावर झालेलं 90 कोटींचं कर्ज, फेडण्यासाठी घर विकलेलं, शेवटी त्यांनी 18 तास…, रजनीकांत यांनी केला खुलासा

बॉलिवूडचे महानायक अमिताभ बच्चन यांनी आपल्या अभिनयाच्या जोरावर हिंदी चित्रपटसृष्टीत वेगळी ओळख निर्माण केली आहे. मात्र, त्यांच्या आयुष्यात एक काळ असा होता, जेव्हा त्यांना आर्थिक संकटाचा सामना करावा लागला होता. जवळपास 90 कोटी रुपयांच्या कर्जामुळे त्यांच्यावर मोठे संकट ओढवले होते. अशा कठीण परिस्थितीतून त्यांनी कशी वाट काढली, याचा किस्सा सुपरस्टार रजनीकांत यांनी सांगितला होता. त्यांचा हा जुना व्हिडिओ पुन्हा चर्चेत आला आहे.

अमिताभ बच्चन यांनी अभिनय क्षेत्रात मोठे यश मिळवल्यानंतर ‘अमिताभ बच्चन कॉर्पोरेशन लिमिटेड’ (ABCL) ही निर्मिती कंपनी सुरू केली. मात्र, या व्यवसायात अपेक्षित यश मिळाले नाही. त्यामुळे त्यांच्यावर मोठे आर्थिक संकट आले आणि ते कर्जबाजारी झाले. या परिस्थितीत त्यांना आपली मालमत्ताही विकावी लागल्याचे सांगितले जाते.

कर्ज फेडण्यासाठी दिवसाचे 18 तास काम

रजनीकांत यांनी अमिताभ बच्चन यांच्या संघर्षाबद्दल बोलताना सांगितले की, कठीण परिस्थितीतही त्यांनी हार मानली नाही. आर्थिक अडचणी आणि आरोग्याच्या समस्यांचा सामना करत त्यांनी दिवसाचे तब्बल 18 तास काम केले. मेहनत, जिद्द आणि चिकाटीच्या जोरावर त्यांनी आपले कर्ज फेडले आणि पुन्हा स्वतःचे आर्थिक आयुष्य उभे केले.

रजनीकांत यांच्या म्हणण्यानुसार, अमिताभ बच्चन यांनी नंतर आपले जुने घर पुन्हा विकत घेतले आणि त्याच परिसरात आणखी घरेही खरेदी केली. त्यांच्या या प्रवासातून संकट कितीही मोठे असले तरी मेहनत आणि आत्मविश्वासाच्या जोरावर त्यावर मात करता येते हे दिसून येते.

रजनीकांत मानतात अमिताभ बच्चन यांना गुरू

रजनीकांत आणि अमिताभ बच्चन यांनी ‘अंधा कानून’ , ‘गिरफ्तार’ आणि ‘हम’ यांसारख्या चित्रपटांमध्ये एकत्र काम केले आहे. तब्बल 33 वर्षांनंतर 2024 मध्ये ‘वेट्टैयन’ या चित्रपटातून ही जोडी पुन्हा एकदा मोठ्या पडद्यावर एकत्र आली. रजनीकांत अमिताभ बच्चन यांना आपले मार्गदर्शक मानतात.

That Is #AmitabhBachchan 🔥🙌 Haters in Mumbai Laughed at AB, Saying “He’s Doing Ads For Money” Just 3 years… Age 64 1000 Problems in the body… He Worked 18 hours per day & Paid All Debt Brought the same house & 3 more on the same road. ~ #Rajinikanth ji https://t.co/bHZf7HmqJk

— 𝐒ʜᴀɴɪ 𝐘ᴀᴅᴀᴠ (@JrYadav1409) October 13, 2026

अमिताभ बच्चन यांचा संघर्ष, त्यांची मेहनत आणि पुन्हा उभे राहण्याची जिद्द आजही अनेकांसाठी प्रेरणादायी आहे. यशाच्या शिखरावर पोहोचल्यानंतरही कठीण काळात हार न मानणाऱ्या अमिताभ बच्चन यांच्या प्रवासामुळे त्यांच्या चाहत्यांच्या मनातील त्यांच्याबद्दलचा आदर अधिक वाढला आहे.