आशा भोसलेंची एक इच्छा राहिली अपूर्ण… रितेश देशमुखने सांगितला किस्सा, म्हणाला, कुटुंबाचा फोन आला…

दिग्गज गायिका आशा भोसले यांचे काही दिवसांपूर्वी निधन झालेले आहे. सिंगिंग रिअॅलिटी शो इंडियन आयडलचा आगामी भाग आशा भोसले यांना समर्पित असणार आहे. या खास प्रसंगी बॉलिवूड अभिनेता आणि चित्रपट निर्माता रितेश देशमुखने कार्यक्रमाला हजेरी लावून आशा ताईंशी असलेल्या त्यांच्या जिव्हाळ्याच्या नात्याच्या आठवणी सांगत त्यांना श्रद्धांजली वाहिली. रितेश यांनी सांगितले की आशा भोसले त्यांच्यासाठी फक्त महान गायिका नव्हत्या, तर त्यांचं नातं आई-मुलासारखं होतं. या वेळी त्यांनी आतापर्यंत न ऐकलेले किस्से शेअर केले आहेत.

रितेश देशमुख काय म्हणाला?

एका वृत्तसंस्थेच्या अहवालानुसार, आशा भोसले यांच्यासोबतच्या आठवणीचा उल्लेख करताना रितेश म्हणाला की, ‘त्या जेव्हा त्यांना भेटायच्या तेव्हा त्यांच्या डोक्यावर प्रेमाने हात फिरवायच्या. जेव्हा त्या मला पहिल्यांदा भेटल्या, तेव्हा त्यांनी अगदी आई आपल्या मुलावर जसं प्रेमाने हात फिरवते तसं माझ्या डोक्यावर हात फिरवला. त्या दिवसापासून मी त्यांना आशा आई म्हणायला सुरुवात केली आणि आजही मी त्यांना त्याच नावाने हाक मारतो.’

सांगितला खास किस्सा

आशाताईंसोबतच्या जुन्या आठवणींना उजाळा देताना रितेश म्हणाला की, ‘एकदा गप्पांच्या ओघात आशा ताईंनी मला विचारलं होतं, तुला काय आवडतं? तू काय खातोस? त्यानंतर त्यांनी रितेश यांना प्रेमाने घरी बोलावलं. मी त्यांच्या घरी गेलो, तिथे एकत्र जेवण केलं आणि खूप गप्पा मारल्या. ही भेट माझ्या मनात कायमची कोरली गेली आहे.’

आशाताईंची ती इच्छा अपूर्ण राहिली

रितेश देशमुख यांनी छत्रपती शिवाजी महाराजांवर आधारित ‘राजा शिवाजी’ या चित्रपटाबाबत बोलताना म्हटले की,’आशा ताईंनी फोन करून म्हटलं होतं, माझा आशीर्वाद तुझ्यासोबत आहे, तू एक चांगला चित्रपट बनव. तो रिलीज झाल्यावर मी नक्की पाहीन. सुमारे दोन आठवड्यांपूर्वी त्यांच्या कुटुंबाकडून फोन आला होता की आशा ताईंना हा चित्रपट पाहण्याची खूप इच्छा होती. मात्र दुर्दैवाने आशा आई आता हा चित्रपट पाहू शकणार नाहीत.’