Raja Shivaji : ‘राजा शिवाजी’मधील सलमानच्या एण्ट्रीवर टाळ्यांचा कडकडाट; व्हिडीओ तुफान व्हायरल

अभिनेता रितेश देशमुखचा बहुचर्चित आणि बहुप्रतिक्षित ‘राजा शिवाजी’ हा चित्रपट आज 1 मे 2026 रोजी प्रेक्षकांच्या भेटीला आला आहे. छत्रपती शिवाजी महाराजांच्या गौरवशाली आयुष्यावर आधारित या चित्रपटात बॉलिवूड आणि मराठी कलाकारांची मोठी फौज पहायला मिळणार आहे. रितेशनेच या चित्रपटाचं दिग्दर्शन केलं असून त्यानेच छत्रपती शिवाजी महाराजांची भूमिका साकारली आहे. तर जिनिलिया देशमुख, अभिषेक बच्चन, बोमन इराणी, फरदीन खान, महेश मांजरेकर, सचिन खेडेकर, विद्या बालन यांसारख्या कलाकारांच्याही यात भूमिका आहेत. विशेष म्हणजे अभिनेता सलमान खानने यात पाहुण्या कलाकाराची भूमिका साकारली आहे. आता या चित्रपटातील सलमानच्या कॅमिओचा सीन सोशल मीडियावर तुफान व्हायरल होत आहे. सलमानच्या एण्ट्रीवर थिएटरमध्ये एकच टाळ्यांचा कडकडाट होतो. ‘राजा शिवाजी’मध्ये सलमानने जिवा महाला यांची भूमिका साकारतोय.

गेल्या काही महिन्यांपासून सलमानच्या भूमिकेविषयी गुप्तता पाळण्यात आली होती. ‘बिग बॉस मराठी 6’च्या ग्रँड फिनालेमध्ये रितेशने त्याच्या भूमिकेविषयी घोषणा केली होती. आता थिएटरमध्ये सलमानची एण्ट्री पाहून प्रेक्षकांना फारच आनंद झाला आहे. त्याच्या एण्ट्रीच्या सीनचा व्हिडीओ सोशल मीडियावर व्हायरल होत असून त्यावर लाइक्स आणि कमेंट्सचा वर्षाव होत आहे. या सीनमधील सलमानचा लूक विशेष लक्ष वेधून घेतो. भगव्या रंगाचा फेटा आणि कुर्ता, हातात तलवार असा हा त्याचा दमदार लूक आहे. शत्रूच्या मानेवर तलवार रोखून तो म्हणतो, ‘शिवाजी नाही, शिवाजी राजं म्हणायचं..’ आणि थिएटरमध्ये एकच जल्लोष होतो.

‘राजा शिवाजी’च्या प्रमोशनिमित्त दिलेल्या मुलाखतीत रितेशने सलमानच्या निवडीचा किस्सा सांगितला होता. या चित्रपटात सलमानसाठी कोणतीच भूमिका निश्चित नव्हती, मात्र त्याने आग्रह धरून यात भूमिका मागून घेतली, असं रितेशने सांगितलं. “मी या चित्रपटासाठी सलमानशी संपर्क साधला नव्हता. आम्ही नवीन वर्षाच्या दिवशी भेटलो होतो. मला त्याने विचारलं की, मी या चित्रपटाचं शूटिंग कधी सुरू करणार आहे? तेव्हा मी त्याला म्हणालो की या महिन्यातच सुरू होत आहे. सलमान म्हणाला, मग मी कोणती भूमिका त्यात साकारतोय? जेव्हा मी सलमानला सांगितलं की माझ्याकडे त्याच्यासाठी कोणतीही भूमिका नाही, तेव्हा त्याने या प्रोजेक्टचा भाग होण्याचा आग्रह धरला. तो म्हणाला, नाही नाही नाही.. तू माझ्याशिवाय हा चित्रपट बनवू शकत नाही. मला त्यात असायलाच हवं. मग त्याच्यासाठी भूमिकेचा विचार केला आणि अशा प्रकारे तो या चित्रपटाचा भाग बनला”, असं रितेश म्हणाला.