स्तनपान करणाऱ्या आईला..; फूड ब्लॉगरवर का भडकली स्वरा भास्कर?
अभिनेत्री स्वरा भास्कर पुन्हा एकदा एक्सवर सक्रिय झाली असून एका फूड ब्लॉगरला तिने सडेतोड उत्तर दिलं आहे. शाकाहार आणि मांसाहारावरून या दोघींमध्ये ट्विटर वॉर सुरू झाला. त्यानंतर तो बॉडी शेमिंगपर्यंत पोहोचला.
आपल्या बेधडक वक्तव्यांमुळे चर्चेत असलेली अभिनेत्री स्वरा भास्कर पुन्हा एकदा एक्स (ट्विटर) अकाऊंटवर सक्रिय झाली आहे. बकरी ईदच्या दिवशी शाकाहाराबद्दल पोस्ट लिहिणाऱ्या एका आहारतज्ज्ञावर तिने निशाणा साधला होता. त्यानंतर या दोघींमध्ये सोशल मीडियावर शाब्दिक चकमक सुरू झाली. आता त्याच आहारतज्ज्ञाने स्वराला तिच्या वाढलेल्या वजनावरून हिणवलं आहे. त्यावर अभिनेत्रीने तिला सडेतोड उत्तर दिलं आहे. सोशल मीडियावर या दोघींमधील वाद चर्चेत आला आहे.
आहारतज्ज्ञ आणि फूड ब्लॉगरने स्वराचा आधीचा आणि आताचा फोटो कोलाज करून एक्सवर पोस्ट केला. त्यावर तिने लिहिलं, ‘तिने काय खाल्लं?’ त्यावर स्वराने तिला उत्तर दिलं, ‘तिने मूल जन्माला घातलंय आणि तुम्ही यापेक्षा चांगलं काहीतरी काम करा, नलिनी.’ स्वराच्या या उत्तरावर फूड ब्लॉगरने भलीमोठी पोस्ट लिहिली आहे. त्यात तिने म्हटलं, ‘मी माझं चांगलंच काम करत होते. पण माझ्या शाकाहारी पोस्टवर द्वेष पसरवून तू माझ्या मार्गात आलीस. मी नियमितपणे शाकाहाराचा प्रचार करते आणि ती पोस्टसुद्धा त्याचाच भाग होता. तुझ्या प्रतिक्रियेमुळे तो धर्माचा मुद्दा बनला, यामुळेच मी तेव्हा तुला उत्तर दिलं नव्हतं.’
What did she eat? pic.twitter.com/8SPxteuGdE
— Nalini Unagar (@NalinisKitchen) June 21, 2024
‘तुझ्या खाण्यापिण्याच्या निवडी तुझ्या स्वत:च्या आहे आणि माझी त्यात काहीच हरकत नाही. पण मीसुद्धा शाकाहाराचा प्रचार करण्यास मोकळी आहे. होय मी शाकाहारी आहे आणि मला माहित आहे की डेअरी (दूध आणि दुग्धजन्य पदार्थ) पदार्थ खाण्यातही क्रूरत आहे. मी ज्यादिवशी विगन (शाकाहारीसोबतच दूध किंवा दुग्धजन्य पदार्थ न खाणारे) होईन तेव्हा मला स्वत:चा अधिक अभिमान वाटेल. तुझ्या पोस्टने हा जातीय मुद्दा बनला आणि तुझा मोठा चाहतावर्ग आहे. त्यामुळे कृपया अशा टिप्पण्या करण्यापूर्वी दोन वेळा विचार करा. तुझ्या शब्दांचा समाजावर परिणाम होऊ शकतो आणि माझ्यासारख्या लोकांसाठी त्याचा खूप त्रास होऊ शकतो. तुझा फोटो टाकून मी चुकले, हे मान्य करते. तो फोटो मी लवकरच हटवेन. पण घाबरू नकोस, तुझ्या चुका स्वीकार आणि माझ्यावरील द्वेष दूर कर’, असं तिने स्वरासाठी लिहिलं.
Let’s get into this! U got upset that I called out your veg-supremacy post- clearly intended to target Muslims on Bakr-Eid. Ok. But instead of engaging with me on vegetarianism you chose to shame a breast-feeding mother of an infant for putting on weight?? You are a nutritionist? https://t.co/lpPtgMHe1w
— Swara Bhasker (@ReallySwara) June 22, 2024
फूड ब्लॉगरच्या या पोस्टवर स्वरानेही प्रत्युत्तर दिलंय. ‘या मुद्द्याकडे नीट लक्ष देऊयात. बकरी ईच्या दिवशी मुस्लिमांना टार्गेट करण्याच्या हेतूने तू शाकाहाराबद्दलची पोस्ट लिहिली होतीस, म्हणून मी आवाज उठवला. ठीक आहे. पण माझ्यासोबत शाकाहाराच्या मुद्द्यावरून भिडण्यापेक्षा तू स्तनपान करणाऱ्या आईच्या वाढलेल्या वजनावरून बॉडीशेम केलंस. तू खरंच आहारतज्ज्ञ आहेस का?’, असा सवाल स्वराने केला आहे.
स्वरा आणि फूड ब्लॉगरमधील ही शाब्दिक चकमक सध्या सोशल मीडियावर बरीच चर्चेत आहे. स्वराला वाढलेल्या वजनावरून ट्रोल केल्याने नेटकऱ्यांनीही संबंधित फूड ब्लॉगरवर नाराजी व्यक्त केली आहे.
