इन्स्पेक्टरची मुलगी आहे, छापा टाकला तर थेट..; कोणावर भडकली ‘तारक मेहता..’ची अभिनेत्री?

‘तारक मेहता का उल्टा चष्मा’ ही छोट्या पडद्यावरील अत्यंत लोकप्रिय मालिका आहे. या मालिकेतील प्रत्येक कलाकाराने प्रेक्षकांच्या मनात विशेष स्थान निर्माण केलं आहे. जेठालाल, दयाबेन, बबिता, टप्पू, माधवी भिडे, अंजली भाभी.. या भूमिका साकारणारे कलाकार घराघरात पोहोचले आहेत. या मालिकेत अभिनेत्री नेहा मेहताने अंजली भाभीची भूमिका साकारली होती. परंतु काही वर्षांनंतर तिने ही मालिका सोडली. सध्या ती ‘इत्ती सी खुशी’ या मालिकेतून प्रेक्षकांच्या भेटीला येत आहे. गेल्या काही दिवसांत नेहाचा लूकसुद्धा बदलला आहे. अशातच सोशल मीडियावरील फेक आयडीमुळे ती चर्चेत आली आहे. नुकत्याच दिलेल्या एका मुलाखतीत तिने यावर तीव्र नाराजी व्यक्त केली आहे. तिच्या नावाने फेक आयडी चालवणाऱ्यांना तिने थेट इशारा दिला आहे.

‘बजोका स्पॉटलाइट’ला दिलेल्या मुलाखतीत नेहाने सांगितलं की अनेकजण तिच्या नावाने सोशल मीडियावर फेक (बनावट) आयडी चालवत आहेत. माझ्याशी पंगा घेऊ नका, तुमची हालत खराब करून टाकेन, अशा शब्दांत तिने लोकांना इशारा दिला आहे. या मुलाखतीत नेहाला विचारण्यात आलं होतं की, तुला रील आवडतात की अल्बम? त्यावर उत्तर देताना ती म्हणाली, “रीलपर्यंत तर मी पोहोचले नाही. सोशल मीडियावर पाहिलंत तर माझ्यापेक्षा जास्त माझे फेक आयडी आणि फॅन आयडी आहेत. काय काय बनवले आहेत काय माहीत? लोक माझ्या नावाने लाखो रुपये कमावत आहेत. ज्यादिवशी छापा पडेल ना.. इन्स्पेक्टरची मुलगी आहे, ज्यादिवशी छापा टाकेन त्यादिवशी सर्वांची हालत खराब होईल.”

View this post on Instagram

A post shared by Neha K Mehta (@mehta.neha.sk)

नेहा मेहताने दिलेली ही प्रतिक्रिया चाहत्यांमध्ये चांगलीच चर्चेत आली आहे. सोशल मीडियावर सेलिब्रिटींचे चाहते त्यांच्या नावाने अनेक फॅन पेजेस किंवा अकाऊंट्स चालवतात. त्यातून त्यांची कमाईसुद्धा होत असते. बरेच फेक अकाऊंट्ससुद्धा क्रिएट केले जातात. यावरूनच नेहा मेहताने ही प्रतिक्रिया दिली आहे. नेहान ‘तारक मेहता का उल्टा चष्मा’ ही मालिका सोडल्यानंतर कामातून काही काळ ब्रेक घेतला होता. जवळपास पाच वर्षांनंतर ती पुन्हा टीव्ही मालिकेत परतली आहे. ‘इत्ती सी खुशी’ या मालिकेतून तिने कमबॅक केलं असून तिच्या भूमिकेला प्रेक्षकांकडून पसंती मिळतेय.