तुमच्याने होत नसेल तर, माझ्या पैशांनी बोर्ड लावते..; वंदना गुप्ते संतापल्या, नवी मुंबई एअरपोर्टचा व्हिडीओ चर्चेत

नवी मुंबई आंतरराष्ट्रीय विमानतळामुळे परिसरातील रस्ते, वाहतूक आणि कनेक्टिव्हिटीचा मुद्दा गेल्या काही काळापासून चर्चेत आहे. अशातच ज्येष्ठ अभिनेत्री वंदना गुप्ते यांनी विमानतळाकडे जाणाऱ्या मार्गावर दिशादर्शक फलक नसल्यावरून नाराजी व्यक्त केली आहे. त्यांच्या रोखठोक वक्तव्याचा व्हिडीओ सध्या सोशल मीडियावर चर्चेचा विषय ठरत आहे. वंदना गुप्ते या केवळ अभिनयासाठीच नव्हे, तर सामाजिक आणि सार्वजनिक मुद्द्यांवर स्पष्टपणे मत मांडण्यासाठीही ओळखल्या जातात. एखादी गोष्ट गैरसोयीची किंवा चुकीची वाटली तर त्याबाबत आवाज उठवण्यास त्या मागेपुढे पाहत नाहीत. यावेळी त्यांच्या नाराजीचा केंद्रबिंदू नवी मुंबई विमानतळाच्या परिसरातील रस्त्यांवरील साइनबोर्ड ठरला आहे.

दिशा समजण्यासाठी फलक नसल्याने नाराजी

विमानतळाकडे जाणाऱ्या रस्त्यावर प्रवाशांना योग्य मार्ग समजण्यासाठी पुरेसे दिशादर्शक फलक असणं गरजेचं आहे. मात्र, अशा महत्त्वाच्या ठिकाणीच योग्य साइनबोर्ड दिसत नसल्याबद्दल वंदना गुप्ते यांनी प्रश्न उपस्थित केला. त्यांच्या म्हणण्यानुसार, विमानतळासारख्या महत्त्वाच्या ठिकाणी येणाऱ्या नागरिकांना कोणत्या दिशेने जायचं, कोणता मार्ग घ्यायचा किंवा पुढे कोणता रस्ता आहे, याची माहिती सहज मिळायला हवी. विशेषतः पहिल्यांदाच या भागात येणाऱ्या वाहनचालकांसाठी स्पष्ट दिशादर्शक फलक अत्यंत आवश्यक आहेत.

‘खर्च परवडत नसेल तर मी पैसे देते’

या व्हिडीओमध्ये वंदना म्हणाल्या, “मी मुंबईहून कोल्हापूर एअरपोर्टला जात आहे. यासाठी मी नवी मुंबईच्या एअरपोर्टवरून प्रवास करणार आहे. नवी मुंबई एअरपोर्टला मी अटल सेतूनं आले आहे. पण इथे कुठल्याच ठिकाणी एअरपोर्टसाठीची खूण किंवा बोर्ड लावलेला नाही. आम्ही अंदाज घेत एअरपोर्टच्या दिशेनं प्रवास करतोय. मला काहीच कळत नाहीये, हा रस्ता नक्की कुठे जातोय? हाच रस्ता जर एअरपोर्टला पोहोचत असेल तर कृपया इथे बोर्ड लावा. तुमच्याने जमत नसेल तर मी स्वत: बोर्डसाठी पैसे खर्च करते. मी माझ्या पैशांनी बोर्ड लावते.”

वंदना गुप्ते यांच्या प्रतिक्रियेनंतर सोशल मीडियावरही यावर चर्चा सुरू झाली आहे. विमानतळासारख्या महत्त्वाच्या पायाभूत सुविधेकडे जाणाऱ्या रस्त्यांवर प्रवाशांना स्पष्ट माहिती देणारी यंत्रणा असणं आवश्यक आहे, असं मत अनेकांकडून व्यक्त होत आहे.