भिकाऱ्याच्या वेशात या प्रसिद्ध गायकाने 3 तास रस्त्यावर गायली गाणी, एका मुलाने दिले 12 रुपये अन् म्हणाला…
बॉलिवूड इंडस्ट्रीमधील सर्वात प्रसिद्ध गायकाने जेव्हा भिकाऱ्याच्या वेशात बसून भर रस्त्यावर जेव्हा गायली गाणी. तेव्हा एका मुलाने त्यांच्या हातावर दिले होते 12 रुपये. त्याचे शब्द ऐकून गायक झालेला भावूक.
बॉलिवूड इंडस्ट्रीमधील अनेक कलाकार हे वेगवेगळ्या लुकमुळे अनेकदा प्रेक्षकांना ओळखू देखील येत नाहीत. असाच एक प्रकार सध्या समोर आला आहे. बॉलिवूडचे प्रसिद्ध गायक सोनू निगम यांनी एकदा आपल्या चाहत्यांना आणि सर्वसामान्यांना आश्चर्यचकित करणारा एक अनोखा प्रयोग केला होता. 2016 मध्ये त्यांनी मुंबईतील जुहू परिसरात भिकाऱ्याचा वेश धारण करून रस्त्याच्या कडेला बसत तब्बल तीन तास गाणी गायली होती. विशेष म्हणजे, या काळात त्यांना पाहणाऱ्या जवळपास कोणालाही ते सोनू निगम आहेत याची कल्पना आली नाही.
सोनू निगम यांनी खराब मळलेले कपडे परिधान करून हार्मोनियम घेतला आणि रस्त्यावर बसून गाणी म्हणण्यास सुरुवात केली. हा प्रयोग एका सोशल एक्सपेरिमेंटचा भाग होता. त्यांनी वेगवेगळ्या ठिकाणी सुमारे एक-एक तास गाणी गायली आणि अनेक गाणी सादर केली. वाहतूक, गर्दी आणि आजूबाजूच्या गोंगाटात मायक्रोफोनशिवाय गाणे गाणे त्यांच्यासाठी मोठे आव्हान होते.
सोनू निगम यांनी नंतर सांगितले होते की, लोक त्यांच्या आजूबाजूला जमू लागल्यावर त्यांना आपली खरी ओळख समोर येईल याची भीती वाटत होती. रस्त्यावर बसून गाणे हा त्यांच्यासाठी अत्यंत नम्र करणारा आणि वेगळा अनुभव होता.
मात्र या संपूर्ण प्रयोगादरम्यान एक घटना सोनू निगम यांच्या मनाला चांगलीच भिडली. एक लहान मुलगा त्यांच्याजवळ आला. त्याने सोनू निगम यांचा हात हातात घेतला आणि, ‘अंकल, तुम्ही नाश्ता केला का?’ असे विचारले. त्यानंतर त्या मुलाने कुणालाही न कळता त्यांच्या हातात 12 रुपये ठेवले.
ते 12 रुपये आजही आठवणीत
या छोट्याशा मदतीने सोनू निगम भावूक झाले. त्यांनी सांगितले होते की, त्या मुलाने हातात ठेवलेले 12 रुपये आपल्यासाठी लाखो रुपयांपेक्षा मौल्यवान होते. त्यामुळे त्यांनी ते पैसे आपल्या ऑफिसमध्ये फ्रेम करून जपून ठेवण्याचा निर्णय घेतला.
या मुलाचे नाव शाहबाज असल्याचे समोर आले. सोनू निगम यांनी त्याचा शोध घेऊन त्याला आपल्या घरी भेटण्यासाठी बोलावले. विशेष म्हणजे, शाहबाजला आपण ज्याला रस्त्यावर भिकारी समजून 12 रुपये दिले होते ते प्रत्यक्षात प्रसिद्ध गायक सोनू निगम होते याची अजिबात कल्पना नव्हती. शाहबाज आणि सोनू निगम यांची भेट झाल्यानंतर हा प्रसंग आणखी भावूक झाला. एका अनोळखी व्यक्तीला मदत करण्यासाठी दिलेली अवघी 12 रुपयांची रक्कम सोनू निगम यांच्यासाठी आयुष्यभर लक्षात राहणारी आठवण ठरली.
