कोर्टातील युक्तिवाद संपवण्याआधी… ठाकरेंचे वकील देवदत्त कामत यांची कोर्टाकडे मोठी मागणी

शिवसेना पक्षचिन्हाबाबत सुप्रीम कोर्टात सुरू असलेली सुनावणी आज पूर्ण झाली. ठाकरे गटाचे वकील देवदत्त कामत यांनी महत्त्वपूर्ण युक्तिवाद करताना अनेक मुद्दे मांडले. कामत यांनी कोर्टात सांगितले की, राजकीय संघटनेमध्ये ठाकरे गटाकडे स्पष्ट बहुमत होते, याचे पुरावे म्हणून १९ लाखांपेक्षा जास्त प्रतिज्ञापत्रे सादर करण्यात आली होती, तर शिंदे गटाकडे केवळ ४ लाखांपेक्षा जास्त प्रतिज्ञापत्रे होती. चिन्ह कुणालाही देता येत नसेल तर ते तात्पुरते गोठवावे, अशी मागणी कपिल सिब्बल यांच्यानंतर देवदत्त कामत यांनीही केली.

याव्यतिरिक्त, आमदारांच्या अपात्रतेचा निर्णय विधानसभा अध्यक्षांनी न घेता, सुप्रीम कोर्टानेच घ्यावा अशी आग्रही मागणी कामत यांनी केली. अध्यक्षांनी आमचा विश्वास गमावला असल्याचे कामत यांनी कोर्टाच्या निदर्शनास आणले. राजकीय पक्ष आणि विधिमंडळ पक्ष हे वेगळे असल्याचा युक्तिवाद करत, फक्त आमदार संख्येवर निर्णय दिल्यास पक्षांतरबंदी कायद्याला अर्थ राहणार नाही, असेही कामत यांनी स्पष्ट केले. २०१८ च्या शिवसेनेच्या घटनेबाबत शिंदे गटाने उपस्थित केलेल्या प्रश्नांनाही कामत यांनी उत्तर दिले.