टायगरची मदत न करणाऱ्यांवर भडकला विद्युत जामवाल; मराठी अभिनेत्रीने सुनावलं, पैसे घेता अन् बोलता..

विद्युत जामवाल आणि टायगर श्रॉफ

अभिनेता टायगर श्रॉफ याच्यावरील गोळीबाराच्या घटनेनंतर मनोरंजन विश्वात अनेक प्रतिक्रिया उमटत आहेत. अभिनेता विद्युत जामवाल याने या घटनेवर प्रतिक्रिया देताना टायगरच्या चाहत्यांना जाब विचारला होता. तिथे उपस्थित असलेल्या अनेकांनी आपण टायगरचे मोठे चाहते असल्याचं सांगितलं असेल, तर मग संकटाच्या वेळी त्याच्यासाठी पुढे येण्याची तयारी का दाखवली नाही, असा सवाल त्याने केला होता. याच वक्तव्यावर आता मराठी अभिनेत्री यशश्री मसुरकर हिने तीव्र नाराजी व्यक्त केली आहे. कलाकारांनी स्वतःला सर्वसामान्यांपेक्षा मोठं समजू नये, असं म्हणत तिने ‘गॉड सिंड्रोम’चा मुद्दा उपस्थित केला. तसंच कलाकार समाजासाठी नेमकं काय करतात, असा थेट सवालही तिने विद्युतला विचारला आहे. यशश्रीचा हा व्हिडीओ सध्या चर्चेत आला असून, सोशल मीडियावर तिच्या भूमिकेची चर्चा सुरू आहे.

नेमकं काय म्हणाला होता विद्युत जामवाल?

18 ऑक्टोबर 2026 रोजी मुंबईतील जुहू परिसरात टायगर श्रॉफच्या गाडीवर गोळीबार झाल्याची घटना घडली. या घटनेत टायगर सुरक्षित राहिला, मात्र त्याचा चालक आणि अन्य एका व्यक्तीला दुखापत झाली. या घटनेनंतर विद्युत जामवालने सोशल मीडियावर व्हिडीओ शेअर करत टायगरला धीर दिला. विद्युतने टायगरला निडर व्यक्ती म्हटलं. मात्र, त्याच वेळी त्याने घटनास्थळी उपस्थित असलेल्या चाहत्यांनाही प्रश्न विचारले. टायगरचे सामने पाहण्यासाठी जाणारे आणि आपण त्याचे सर्वांत मोठे चाहते असल्याचे सांगणारे लोक हल्ल्याच्या वेळी पुढे का आले नाहीत? त्यांच्यापैकी कुणीतरी हल्लेखोरांच्या मागे धावायला किंवा त्यांना पकडण्याचा प्रयत्न करायला हवा होता, असं मत त्याने व्यक्त केलं.

पहा व्हिडीओ-

याशिवाय विद्युतने मुंबई पोलिसांनाही अशा घटना पुन्हा घडू नयेत, यासाठी खबरदारी घेण्याचं आवाहन केलं. त्याच्या या वक्तव्यावर संमिश्र प्रतिक्रिया उमटल्या. काहींनी त्याच्या भूमिकेचं समर्थन केलं, तर काहींनी नागरिकांनी स्वतःचा जीव धोक्यात घालून हल्लेखोरांचा सामना करणं कितपत योग्य आहे, असा प्रश्न उपस्थित केला.

यशश्री मसुरकरने विद्युतला सुनावले खडेबोल

यशश्री मसुरकरने सोशल मीडियावर व्हिडीओ शेअर करत विद्युतच्या वक्तव्यावर आक्षेप घेतला. “मी स्वतः एक कलाकार आहे. पण काही कलाकारांना जो गॉड सिंड्रोम असतो ना, त्याचा मला राग येतो,” अशा शब्दांत तिने आपली भूमिका मांडली. विद्युतने चाहत्यांनी हल्लेखोरांच्या मागे धावायला हवं होतं, असं म्हटल्याचा संदर्भ देत यशश्रीने त्याला थेट प्रश्न विचारलं. कलाकार म्हणून तुम्ही समाजासाठी काय करता? एखाद्या व्यक्तीवर अन्याय होत असताना किंवा देशात गंभीर समस्या निर्माण झाल्या असताना तुम्ही किती वेळा आवाज उठवता? असा सवाल तिने केला.

विद्यार्थ्यांवरील लाठीमार, अश्रुधुराचा वापर, दुष्काळ, आंदोलने आणि निवडणुकांशी संबंधित प्रश्न अशा विविध मुद्द्यांचा उल्लेख करत तिने कलाकारांच्या सामाजिक जबाबदारीवर भाष्य केलं. एखाद्या घटनेवेळी सामान्य नागरिकांकडून अपेक्षा ठेवणाऱ्या कलाकारांनीही समाजातील प्रश्नांवर आपली भूमिका मांडली पाहिजे, असं तिचं म्हणणं आहे. यशश्रीने पुढे कलाकार आणि चाहत्यांच्या नात्याबद्दलही महत्त्वाचं मत व्यक्त केलं. कलाकार हे इतर व्यवसायांप्रमाणेच एक काम करतात आणि त्यासाठी त्यांना मानधन मिळतं. चाहत्यांकडून मिळणारं प्रेम आणि लोकप्रियता ही समाजाने दिलेली खैरात आहे; तो कलाकारांचा जन्मसिद्ध हक्क नाही, असं तिने स्पष्ट केलं.

कलाकार असणं म्हणजे देव असणं नाही. समाजाकडून आपण काही घेतलं ना की, आपलं समाजाला देणंसुद्धा लागतं. तुम्ही ते देता का? उगाच आपलं मी तुमचा राजा, मला डोक्यावर घेऊन नाचा. अपेक्षा दोन्ही बाजूंनी असतात, असं यशश्रीने म्हटलं. यशश्रीच्या या व्हिडीओवर अनेकांनी प्रतिक्रिया दिल्या असून, काही नेटकऱ्यांनी तिच्या मताशी सहमती दर्शवली आहे.