बांगलादेशानंतर थायलंडमध्ये मोठी राजकीय उलथापालथ, सुप्रीम कोर्टाने पंतप्रधानांना खड्यासारखं दूर केले, ही चूक आली अंगलट
Thailand PM Removes : पाकिस्तान, श्रीलंका, नेपाळ, नुकताच बांगलादेशात राजकीय भूकंप येऊन गेला. आता थायलंडमध्ये पण मोठी राजकीय उलथापालथ झाली आहे. तिथल्या घटनात्मक कोर्टाने पंतप्रधानाची थेट हकालपट्टी केली आहे. काय आहे प्रकरण?
बांगलादेश पाठोपाठ आशियातील आणखी एका देशात मोठी राजकीय उलथापालथ झाली. थायलंडमध्ये राजकीय भूकंप आला. अर्थात येथे कोणतेही आंदोलन झाले नाही. जनता रस्त्यावर उतरली नाही. तर कायद्याच्या मार्गाने सर्वोच्च व्यक्तीला झटका बसला. पंतप्रधान श्रेथा थाविसिन यांची घटनापीठाने थेट हकालपट्टी केली. काय आहे हे प्रकरण, कोणती चूक भोवली थाविसिन यांना?
बहुमताने हकालपट्टीचा निर्णय
एक आठवड्यापूर्वीच थायलंडच्या न्यायालयाने विरोधी पक्ष बरखास्त केला होता. त्यामुळे पंतप्रधानासह मंत्रिमंडळ पण घाबरलेले होते. त्यातच न्यायाधीशांनी 5-4 अशा बहुमताने श्रेथा थाविसिन यांची हकालपट्टी केली. घटनात्मक न्यायालयाने श्रेथा यांना मंत्रिमंडळात नुकत्याच समावेश करण्यात आलेल्या सदस्यावरुन पंतप्रधानांना थेट बाहेरचा रस्ता दाखवला.
ही चूक भोवली
श्रेथा थाविसिन यांनी मंत्रिमंडळात एका वकिलाला नियुक्ती दिली. त्याच्यावर गुन्हेगारीचे आरोप होते. घटनात्मक न्यायालयाने श्रेथा यांना या मंत्रिमंडळातील नवीन सदस्य नियुक्तीत नियमांचं उल्लंघन केल्याने दोषी ठरवलं. हे प्रकरण थायलंडमध्ये यापूर्वी सत्तेत आलेल्या जून्टाकडून नियुक्त माजी सिनेटर्सच्या गटाने उचलून धरले होते.
आता पुढे काय
पिचिट चुएनबान यांची श्रेथा थाविसिन यांनी नियुक्ती केली होती. त्यासाठी मंत्रिमंडळात फेरबदल केला होता. त्याविरोधात आवाज उठवण्यात आला होता. नऊ सदस्यीय घटनापीठाने याविषयीचा निकाल दिला. थाविसिन यांना पदावरुन हाकलण्यात आले. आता संसद नवीन पंतप्रधानांची नियुक्ती करत नाही, तोपर्यंत सध्याचे मंत्रिमंडळ हंगामी म्हणून कारभार पाहिल. पंतप्रधान नियुक्त करण्याविषयी घटनापीठाने कोणतीही मुदत दिलेली नाही.
पिचिट यांना 2008 मध्ये न्यायालयाच्या अवमान प्रकरणात 6 महिन्यांचा तुरुंगवास झाला होता. त्यांनी त्यावेळी तत्कालीन पंतप्रधान थाकसिन शिनावात्रा यांच्या एका प्रकरणात थेट न्यायाधीशांनाच लाच देण्याचा प्रयत्न केला होता. 2 दशलक्ष थाई बॉट चलन देण्याचे आमिष पिचिट यांनी दाखवले होते. त्यानंतर आता त्यांची मंत्रिमंडळात वर्णी लागल्यानंतर मोठा वाद उफाळला. हे प्रकरण न्यायालयात गेले. पिचिट यांनी काही दिवसांपूर्वीच पदाचा राजीनामा दिला आहे. त्यानंतर आता पंतप्रधानांवर मोठी कारवाई झाली. विरोधी पक्षाला पण यापूर्वीच दणका बसला आहे.
