गिनीमध्ये भूस्खलनामुळे मोठी दुर्घटना, 22 जणांचा मृत्यू; अनेकजण अडकले

पश्चिम आफ्रिकेतील देश गिनीची राजधानी कोनाक्री येथे भूस्खलनाची मोठी दुर्घटना घडली. या दुर्घटनेत किमान 22 जणांचा मृत्यू झाला आहे. कोनाक्री येथील सर्वात मोठा कचरा डेपो म्हणजेच दार एस सलाम या ठिकाणी रविवारी पहाटे ही घटना घडली. येथे कचऱ्याचा मोठा ढिगारा अचानक कोसळल्याने परिसरात मोठी दुर्घटना घडली. असोसिएटेड प्रेसने गिनीच्या सिव्हिल प्रोटेक्शन सर्व्हिसच्या प्राथमिक आकडेवारीचा हवाला देत दिलेल्या वृत्तानुसार, या दुर्घटनेत आतापर्यंत किमान 22 जणांचा मृत्यू झाला आहे. तसेच अनेकजण अडकले असल्याची माहिती समोर आली आहे.

झोपड्या कचऱ्याच्या ढिगाऱ्याखाली गाडल्या गेल्या

समोर आलेल्या माहितीनुसार, रविवारी पहाटे सुमारे 3 वाजता कोनाक्रीमध्ये मुसळधार पाऊस सुरू होता. या पावसामुळे कचऱ्याचा मोठा ढिगारा सरकू लागला आणि त्यातून भूस्खलन झाले. या कचरा डेपोच्या आसपास उभारलेल्या झोपड्या कचऱ्याच्या ढिगाऱ्याखाली गाडल्या गेल्या. दुर्घटनेनंतर ढिगाऱ्याखाली अडकलेल्या नागरिकांचा शोध घेण्यासाठी घटनास्थळी शोध आणि बचावकार्य सुरू करण्यात आले असून या घटनेतील मृतांचा आकडा आणखी वाढण्याची भीती व्यक्त केली जात आहे.

कचरा डेपो बंद केला जाणार होता

मिलिटरी इंजिनिअरिंग बटालियनचे स्वच्छता अधिकारी लेफ्टनंट कर्नल बाल्डे मामादोउ बैलो यांनी सांगितले की, दार एस सलाम येथील हा कचरा डेपो रविवारीच बंद केला जाणार होता. तसेच कचरा डेपोच्या आसपास राहणाऱ्या स्थानिक नागरिकांना यापूर्वीच परिसर रिकामा करण्याच्या नोटिसा देण्यात आल्या होत्या. त्यानंतर अनेक नागरिकांनी आपली घरे आणि तात्पुरती ठिकाणे सोडून दुसऱ्या ठिकाणी स्थलांतर केले होते. मात्र, दुर्घटना घडली तेव्हा मोठ्या संख्येने लोक या परिसरात उपस्थित होते. त्यामुळेच 22 लोकांचा मृत्यू झाला आहे.

उर्वरित लोकांचे सुरक्षित स्थलांतर करणार

दुर्घटनेनंतर गिनी सरकारचे मंत्री डिएनाबू तुरे यांनी घटनास्थळी भेट दिली. यावेळी त्यांनी सांगितले की, ‘या परिसरात राहणाऱ्या सर्व कुटुंबांना सुरक्षितपणे दुसऱ्या ठिकाणी स्थलांतरित केले जाईल. प्रशासनाकडून परिसरातील नागरिकांच्या सुरक्षेला प्राधान्य देण्यात येत असून, उर्वरित कुटुंबांना सुरक्षित ठिकाणी नेले जाईल.’