जगात खळबळ! उत्तर कोरियाने धाडधाड मिसाइल्स डागल्या, थेट आणीबाणी जाहीर झाल्याने जग हादरले!

इराण आणि अमेरिका यांच्यातील संघर्ष अजूनही थांबलेला नाही. इराणने अगोर होर्मुझची सामुद्रधुनी खुली केली होती. इस्रायल आणि हेजबोला यांच्यात दहा दिवसांच्या शस्त्रसंधीची घोषणा झाल्यानंतर इराणने हा निर्णय घेतला होता. परंतु आता पुन्हा एकदा इराणने होर्मुझचा जलमार्ग बंद केला आहे. अमेरिका जोपर्यंत इराणशी संबंधित जहाजांवरील नाकेबंदी हटवणार नाही, तोपर्यंत ही सामुद्रधुनी बंदच असेल, असा आक्रमक पवित्रा इराणने घेतला आहे. असे असतानाच आता जगाला हादरवणारी नवी घटना समोर आली आहे. उत्तर कोरियाचा हुकूमशाहा किम जोंग उन यांनी धाडधाड बॅलेस्टिक मिसाइल्स डागल्या आहेत. या धक्कादायक निर्णयानंतर आता जपानने थेट राष्ट्रीय आणीबाणी जाहीर केली आहे.

उत्तर कोरियाने डागल्या मिसाईल्स

मिळालेल्या माहितीनुसार उत्तर कोरियाने अनेक बॅलेस्टिक मिसाईल्स डागल्या आहेत. या घटनेनंतर दक्षिण कोरियाने तत्काळ बैठक बोलावली तर दुसरीकडे जपानने राष्ट्रीय आणीबाणीची घोषणा केली. उत्तर कोरियाच्या या हल्ल्यानंतर जपानच्या पंतप्रधान कार्यालयाने एक्स समाजमाध्यमावर एक पोस्ट केली. या पोस्टमध्ये उत्तर कोरियाने डागलेल्या मिसाईल्सबद्दल सांगण्यात आले आहे. उत्तर कोरियाने डागलेल्या या मिसाईल्स कमी पल्ल्याच्या आहेत. उत्तर कोरियाने या मिसाईल्सची चाचणी केल्याचे म्हटले जात आहे. काही दिवसांपूर्वीच संयुक्त राष्ट्रांनी उत्तर कोरियाचा अण्वस्त्रनिर्मितीचा कार्यक्रम हा चिंताजनक आहे, असे मत व्यक्त केले होते. असे असतानाही उत्तर कोरियाने या बॅलेस्टिक मिसाईल्सची चाणणी केली आहे.

दक्षिण कोरिया, जपानने नेमकं काय केलं?

दुसरीकडे उत्तर कोरियाने या मिसाईल्स डागल्यानंतर दक्षिण कोरियाचे संयुक्त चिफ ऑफ स्टाफने भूमिका स्पष्ट केली. उत्तर कोरियाने सिन्पो क्षेत्रातील समुद्राच्या दिशेने या मिसाईल्स डागल्या आहेत. क्षेपणास्त्र डागल्यानंतर त्या 140 किलोमीटर दूरपर्यंत गेल्या. उत्तर कोरियाने केलेल्या कोणत्याही कारवाईला उत्तर देण्यास आम्ही समर्थ आहोत. आम्ही या हल्ल्याबाबत जपान आणि अमेरिकेला सर्व माहिती देत आहोत, असे दक्षिण कोरियाने सांगितले आहे.

दरम्यान, आता उत्तर कोरियाच्या या कृत्यानंतर संयुक्त राष्ट्र, अमेरिका नेमकी काय भूमिका घेणार, याकडे संपूर्ण जगाचे लक्ष लागले आहे.