Iran-US War Update : इराण-अमेरिकेला एका टेबलावर आणण्यासाठी पडद्यामागे भारताचाही महत्वाचा रोल! आंतरराष्ट्रीय मीडियाकडून खुलासा

मध्य पूर्वेत सुरु असलेलं युद्ध रोखण्यासाठी पडद्यामागे जगातील मोठ्या शक्ती सक्रीय झाल्या आहेत. ट्रम्प यांनी काल, पुढचे पाच दिवस इराणच्या ऊर्जा प्रकल्पांवर हल्ले न करण्याची घोषणा केली. त्याच्याआधी तुर्की आणि ओमानच्या माध्यमातून सक्रीय बॅकचॅनल चर्चा सुरु होत्या. एका वरिष्ठ राजनैतिक अधिकाऱ्याच्या हवाल्याने ही माहिती देण्यात आली आहे. ब्लूमबर्गच्या रिपोर्ट्नुसार आधीपासून मध्यस्थाची भूमिका बजावणारा ओमान पुन्हा एकदा दोन्ही कट्टर प्रतिस्पर्धी देशांना टेबलावर आणण्याचं माध्यम बनला आहे. रिपोर्टनुसार तुर्की, ओमानच नाही तर भारत, सौदी अरेबिया आणि इजिप्तच्या माध्यमातून सतत कूटनीतिक संदेशांचं आदान-प्रदान सुरु होतं.

भारताचे इराण आणि अमेरिका दोघांसोबत चांगले संबंध आहेत. नवी दिल्लीने क्षेत्रीय स्थिरतेसाठी संवादाचा मार्ग खुला ठेवण्यासाठी मदत केली. ट्रम्प यांनी पाच दिवसांसाठी युद्ध विरामाची घोषणा केली, त्यावर या गुप्तचर्चेचा कितपत प्रभाव पडला या बद्दल स्पष्टता नाहीय. कूटनीतीक एक्सपर्ट्सनुसार, या देशांचा दबाव आणि मध्यस्थतेने युद्धाचा फैलाव रोखण्यासाठी ‘सिक्योरिटी वाल्व’ सारख काम केलय.

युद्धाचा हा चौथा आठवडा

सद्य स्थितीत एकाबाजूला सैन्य तणाव आहे. दुसरीकडे अनेक देश पडद्यामागे संघर्ष कमी करण्यासाठी प्रयत्न करत आहेत. युद्धाचा हा चौथा आठवडा आहे. प्रथमच इतके सारे देश अमेरिका आणि इराणमधील मतभेद कमी करण्यासाठी प्रयत्न करत आहेत. येणाऱ्या दिवसात या युद्धावर कूटनितीक तोडगा काढण्याच्या प्रयत्नांना अजून वेग येऊ शकतो असं संकेत मिळतायत.

याआधी अशी बातमी होती की, पाकिस्तान, तुर्की आणि इजिप्त पडद्यामागून दोन्ही देशांना चर्चेच्या टेबलावर आणण्याचे प्रयत्न करत आहेत. अमेरिकेकडून उपराष्ट्रपती जेडी वेन्स या बैठकीत सहभागी होऊ शकतात असाही दावा केला जातोय.

ट्रम्प यांच्या ब्रेकमागे तीन शक्यता काय?

डोनाल्ड ट्रम्प यांनी पाच दिवसांसाठी हा जो युद्ध ब्रेक घेतलाय, त्या संदर्भात वेगवेगळे दावे सुरु आहेत. तेलाच्या बाजारातील किंमती स्थिर ठेवण हा ट्रम्प यांचा एक उद्देश आहे. त्याशिवाय इराणवर मोठा हल्ला चढवण्यासाठी त्यांना अजून वेळ हवाय असही कारण दिलं जात आहे. या युद्धात अमेरिका फसल्याने त्याने सन्मानाने एक्झिट हवीय ही तिसरी शक्यता सुद्धा आहे.