मोठं युद्ध भडकणार? युक्रेनच्या एका हल्ल्याने रशियाचे तब्बल…नेमका काय विध्वंस घडला?

Russia and Ukraine War : सध्या रशिया आणि युक्रेन यांच्यातील युद्ध चांगलंच पेटलं आहे. युक्रेनने रशियावर आतापर्यंतचा सर्वांत मोठा हल्ला केला आहे. या ड्रोन हल्ल्यानंतर रशियानेही प्रत्युत्तरादाखल ड्रोन हल्ले तसेच क्षेपणास्त्र डागले आहेत. यात युक्रेनमधील अनेक नागरिक मृत्युमुखी पडले आहेत. याच कारणामुळे आता दोन्ही देशांतील युद्धाचा नवा अध्याय चालू झाला आहे. दरम्यान, आता नव्या हल्ल्यात युक्रेनने रशियाचे तब्बल 1000 सैनिक मारले असल्याचा दावा केला जातोय.

युक्रेनच्या जनरल्स स्टाफनुसार युक्रेनच्या लष्कराने गेल्या 24 तासांत रशियाचे तब्बल 1100 सैनिक मारले आहेत. यामध्ये बहुसंख्य सैनिक हे कुर्स्क आणि सुमी या भागात तैनात केलेले होते. युक्रेनच्या जनरल स्टाफचा हा दावा ग्राह्य धरला तर युक्रेनने आतापर्यंत रशियाचे तब्बल 990,800 सैनिक मारले आहेत.

ताज्या स्ट्राईकमध्ये 1100 सैनिकांना ठार

युक्रेनच्या या दाव्याबाबत द कीव इंडिपेंन्डंट या वृत्तसंस्थेने वृत्त दिले आहे. या वृत्तानुसार गेल्या 24 तासांत युक्रेनने आपल्या ताज्या स्ट्राईकमध्ये 1100 सैनिकांना ठार केलंय. तर दुसरीकडे रशियाने केलेल्या हल्ल्यात युक्रेनचे एकूण सात नागरिक ठार झाले आहेत. युक्रेनने रशियाच्या हल्ल्यात आतापर्यंत किती जणांचा मृत्यू झाला, याबाबत अद्याप काहीही सांगितले नाही. रिपोर्टनुसार गेल्या 24 तासांत युक्रेनने रशियाच्या आणखी 12 विमानांना नष्ट केलं आहे. तसेच आपल्या या हल्ल्यात रशियाचे एकूण 7 टँकदेखील ध्वस्त झाल्याचा दावा युक्रेनने केलाय. युक्रेनने रशियाची आतापर्यंत 384 विमानं नष्ट केली आहेत.

2 जून रोजी शांतीसाठी दोन्ही देश एकत्र आले पण…

युद्ध थांबवण्यासाठी इस्तानबूलमध्ये दोन्ही देश एकत्र आले होते. एकीकडे युद्धबंदीवर चर्चा होत असताना दुसरीकडे हे दोन्ही देश एकमेकांवर पूर्ण ताकदीने हल्ले करत आहेत. टर्कीच्या इस्तानबूल येथे 2 जून रोजी शांतीसाठी दोन्ही देशांचे प्रतिनिधी एकत्र आले होते. या बैठकीत रशिया आणि युक्रेन या दोन्ही देशांच्या प्रतिनिधींनी भाग घेतला होता. मात्र रशियाचा प्रस्ताव युक्रेनने अमान्य केला. त्यामुळे इस्तानबूलमधील ही बैठक फलदायी ठरली नाही.

रशियाची तब्बल 40 लढाऊ विमानं ध्वस्त

दरम्यान, युक्रेनने रशियाचे 1100 सैनिकं मारल्यानंतर आता रशियादेखील चांगलाच चवताळण्याची शक्यता आहे. रशिया आता युक्रेनवर मोठा प्रतिहल्ला करणार असे बोलले जात आहे. रविवारी म्हणजेच 1 जून रोजी युक्रेनने रशियावर 117 ड्रोनच्या माध्यमातून हल्ला केला होता. या हल्ल्यात रशियाची तब्बल 40 लढाऊ विमानं ध्वस्त झाली होती. त्यानंतर आता युक्रेनने पुन्हा एकदा रशियावर हल्ला केला आहे. आता रशिया युक्रेनला काय प्रत्युत्तर देणार याकडे समस्त जगाचे लक्ष लागले आहे.