चिकनचे दर वाढले, मटणही सातशेपार, पुणे-कोल्हापुरात सोशल डिस्टन्स राखून खरेदी

पुणे : राज्य सरकारने मांसाहार विक्रेत्यांना परवानगी दिल्यामुळे रविवारी खवय्यांनी चिकन-मटण खरेदीसाठी गर्दी केली. ग्राहकांची गर्दी वाढल्याने चिकन आणि मटणाच्या दरातही चांगलीच वाढ झाली. मटणाच्या दरांनी तर सातशेचा आकडा गाठला. (Pune Chicken Shops rush during lockdown)

‘कोरोना’च्या पार्श्वभूमीवर जीवनावश्यक वस्तू खरेदी करण्यासाठी ठराविक अंतर ठेऊन रांग लावावी, असं आवाहन प्रशासनाकडून केलं जात आहे. त्यामुळे सोशल डिस्टन्स राखून मांसाहारप्रेमी रांगेत उभे राहिले, मात्र जिभेचे चोचले पुरवण्यापासून खवय्ये स्वतःला रोखू शकलेले दिसत नाहीत.

ग्राहकांची गर्दी वाढल्याने चिकन आणि मटणाच्या दरातही चांगलीच वाढ झाली. पुण्यात काही दुकानांत मटणाचा दर सातशे रुपये किलोवर गेला. गेल्या काही दिवसात मटणाचा दर सहाशे रुपयावर होता. म्हणजेच मटणाच्या दरात किलोमागे शंभर रुपयांची वाढ झाली.

हेही वाचा : राजनेही मला फोन करुन सूचना दिल्या, त्याबद्दल धन्यवाद : मुख्यमंत्री उद्धव ठाकरे

कोरोना व्हायरसचा सर्वाधिक फटका पोल्ट्री उद्योगाला बसला होता. अनेक ठिकाणी शंभर रुपयांच्या खाली चिकनचे दर घसरले होते. मात्र आता चिकनलाही भाव आला आहे‌. चिकनचे दर दोनशे रुपये किलोवर पोहोचले आहेत. म्हणजेच चिकनच्या दरांमध्येही किलोमागे साठ ते शंभर रुपयांनी वाढ झाली.

मांसाहार खरेदीसाठी नागरिकांची गर्दी झाली मात्र कोरोनाच्या पार्श्वभूमीवर विक्रेते आणि ग्राहक काळजी घेत असल्याचं पाहायला मिळालं. सोशल डिस्टन्स मेंटेन करुन नागरिक रांगेत उभे होते. त्याचबरोबर पोलिसही नागरिकांना काळजी घेण्याचं आवाहन करत होते.

हेही वाचा :  मी श्रीमंत नाही, पण गरजूंना अर्धी भाकर देण्याची दानत, नाशिकच्या शेतकऱ्याचं शिवार खुलं

कोल्हापुरातही संचारबंदीत चिकन-मटणच्या दुकानासमोर खवय्यांच्या रांगा लागल्या. इथेही सोशल डिस्टन्स पाळत खवय्ये मांस खरेदी करत होते. चिकन व्यावसायिकांकडूनही खबरदारी घेतली जात आहे. ग्राहकांच्या हातावर सॅनिटायझर दिल जात आहे. चिकनचे दर कोल्हापुरात 150 ते 180 रुपयापर्यंत वाढले आहेत.

(Pune Chicken Shops rush during lockdown)