रात्री झोपण्यापूर्वी लावा हा घरगुती फेस पॅक; सकाळी उठल्यावर फ्रेश आणि ग्लोइंग दिसेल चेहरा

चेहऱ्यावर नैसर्गिक ग्लो आणि फ्रेशनेससाठी उपाय

दिवसभराची धावपळ, धूळ-माती आणि बदलते वातावरण याचा परिणाम त्वचेवर होतो. त्यामुळे चेहरा निस्तेज दिसू लागतो आणि त्वचेचा नैसर्गिक ग्लो कमी झाल्यासारखा वाटतो. अशावेळी चेहऱ्याची चमक परत मिळवण्यासाठी महागडी स्किन केअर उत्पादने किंवा वारंवार पार्लरमध्ये जाण्याची गरज नाही. घरच्या घरी तयार केलेला साधा फेस पॅक रात्री झोपण्यापूर्वी वापरल्यास त्वचेला फ्रेशनेस आणि मऊपणा मिळण्यास मदत होऊ शकते. विशेष म्हणजे हा उपाय रात्रीच्या स्किन केअर रुटीनमध्ये सहज करता येतो आणि नियमित वापरामुळे त्वचा अधिक तजेलदार दिसण्यास मदत होऊ शकते.

फेस पॅक तयार करण्यासाठी आवश्यक साहित्य

हा घरगुती फेस पॅक तयार करण्यासाठी अर्ध्या संत्र्याची साल, दोन मोठे चमचे चांगले धुतलेले तांदूळ, पाव कप कच्चे दूध, एक मोठा चमचा बेसन, एक छोटा चमचा मध आणि एक छोटा चमचा भाजलेली हळद घ्यावी.

असा तयार करा फेसपॅक

सर्वप्रथम संत्र्याची साल स्वच्छ धुवून घ्यावी. त्यानंतर धुतलेले तांदूळ आणि संत्र्याची साल कच्च्या दुधात मंद आचेवर सुमारे ७ ते ८ मिनिटे शिजवावी. हे मिश्रण व्यवस्थित शिजल्यानंतर ते थंड होऊ द्यावे. थंड झाल्यावर तांदूळ आणि संत्र्याची साल बारीक वाटून त्याची मऊ पेस्ट तयार करावी. या पेस्टमध्ये बेसन, मध आणि भाजलेली हळद घालून सर्व साहित्य चांगले मिसळावे. मिश्रण एकजीव करून गुळगुळीत पेस्ट तयार झाली की फेस पॅक वापरण्यासाठी तयार होतो.

चेहऱ्यावर लावण्याची योग्य पद्धत

फेस पॅक लावण्यापूर्वी चेहरा स्वच्छ करणे महत्त्वाचे आहे. स्वच्छ त्वचेवर तयार केलेला फेस पॅक समान प्रमाणात लावावा आणि साधारण १५ ते २० मिनिटे चेहऱ्यावर राहू द्यावा. त्यानंतर बोटांनी अगदी हलक्या हाताने मसाज करत पॅक धुवून काढावा. त्वचा स्वच्छ करण्यासाठी फेस वॉश वापरायचा नसेल तर कच्च्या दुधाचा वापर करता येतो. हा फेस पॅक आठवड्यातून २ ते ३ वेळा वापरता येतो.

निस्तेज त्वचेला मिळू शकतो फ्रेश लुक

उन्हाच्या संपर्कामुळे किंवा त्वचेची पुरेशी काळजी न घेतल्यामुळे चेहरा निस्तेज दिसू लागतो. अशा वेळी हा फेस पॅक त्वचेला अधिक फ्रेश आणि चमकदार दिसण्यास मदत करू शकतो. यामुळे त्वचेची बनावट मऊ होण्यास आणि नैसर्गिक ग्लो मिळण्यासही मदत होऊ शकते. नियमित स्किन केअरचा भाग म्हणून वापर केल्यास त्वचा अधिक सॉफ्ट आणि हेल्दी दिसण्यास मदत होऊ शकते.

असमान त्वचा टोन सुधारण्यासही मदत

चेहऱ्यावरील त्वचेचा टोन काही ठिकाणी वेगळा दिसत असल्यासही या फेस पॅकचा वापर केला जातो. यातील घटक त्वचेचा असमान टोन सुधारण्यास मदत करू शकतात. तसेच त्वचेला मऊपणा आणि नैसर्गिक चमक मिळण्यास मदत होऊ शकते. मात्र, प्रत्येक व्यक्तीची त्वचा वेगळी असल्याने परिणामही व्यक्तीनुसार बदलू शकतात.

डिस्क्लेमर : वरील माहिती उपलब्ध स्रोतावरून देण्यात आलेली आहे. कोणताही उपाय करण्यापूर्वी आपल्या डॉक्टरांचा सल्ला आवश्य घ्यावा.