फिट राहण्यासाठी माधुरी दीक्षित, डॉ. नेने नेमकं काय करतात? जाणून घ्या त्यांच्या 6 हेल्दी सवयी
निरोगी आणि फिट राहण्यासाठी केवळ व्यायाम किंवा डाएटच नाही, तर रोजच्या छोट्या सवयीही महत्त्वाच्या ठरतात. माधुरी दीक्षित आणि त्यांचे पती डॉ. श्रीराम नेने स्वतःच्या आरोग्यासाठी कोणत्या ६ सवयी पाळतात, याबाबत त्यांनी माहिती दिली आहे. येथे जाणून घ्या सविस्तर
निरोगी आणि फिट राहण्यासाठी महागडे जिमचे साहित्य, कठीण डाएट किंवा तासनतास व्यायाम करण्याची गरज नाही. आपल्या रोजच्या जीवनशैलीत काही छोट्या सवयी लावल्या तरी आरोग्यात सकारात्मक बदल घडू शकतात. बॉलिवुड अभिनेत्री माधुरी दीक्षित यांचे पती हृदयविकारतज्ज्ञ डॉ. श्रीराम नेने यांनी एका मुलाखतीत निरोगी आयुष्यासाठी काही महत्त्वाच्या सवयी सांगितल्या आहेत. माधुरी दीक्षित आणि ते स्वतःही या सवयींचे पालन करतात. योग्य आहार, नियमित शारीरिक हालचाल आणि पुरेशी झोप यांना त्यांनी विशेष महत्त्व दिले आहे. जाणून घेऊया डॉ. नेने यांनी सांगितलेल्या या ६ सवयींबद्दल.
संतुलित आणि पौष्टिक आहार घ्या
डॉ. नेने यांच्या मते, निरोगी राहण्यासाठी योग्य आहार अत्यंत महत्त्वाचा आहे. जेवणात हिरव्या पालेभाज्या, फायबरयुक्त पदार्थ, प्रथिने आणि कार्बोहायड्रेट्सचा समावेश असावा. तसेच एकाच वेळी जास्त खाण्याऐवजी योग्य प्रमाणात खावे. जेवणाचे आधीच नियोजन केल्यास आहारावर नियंत्रण ठेवणे सोपे जाते.
जेवणानंतर चालण्याची सवय लावा
जेवण झाल्यानंतर थोडा वेळ चालणे आरोग्यासाठी फायदेशीर ठरू शकते. डॉ. नेने यांच्या मते, जेवणानंतर चालल्याने स्नायू सक्रिय होतात आणि रक्तातील साखरेचे प्रमाण नियंत्रित ठेवण्यास मदत होते. त्यामुळे जेवणानंतर हलक्या गतीने चालण्याची सवय लावावी.
स्नायू मजबूत करण्यासाठी व्यायाम करा
वाढत्या वयात स्नायूंची ताकद टिकवून ठेवणे महत्त्वाचे असते. यासाठी जिममध्ये जाऊन जड वजन उचलण्याचीच गरज नाही. तर घरातील हलक्या वस्तूंचा वापर करूनही स्नायूंना व्यायाम देता येतो. नियमितपणे सोपे व्यायाम केल्याने स्नायूंची ताकद टिकवण्यास मदत होते.
झोपण्याची ठरावीक वेळ पाळा
शरीराला पुरेशी विश्रांती मिळण्यासाठी चांगली झोप आवश्यक आहे. डॉ. नेने यांच्या मते, दररोज ठरावीक वेळी झोपण्याची सवय असावी. झोपण्यापूर्वी मोबाइल दूर ठेवावा, खोलीतील प्रकाश कमी करावा आणि शांत वातावरणात झोपावे. यामुळे झोपेची गुणवत्ता सुधारण्यास मदत होते.
सोशल मीडियावरील हेल्थ ट्रेंड्सपासून सावध राहा
आजकाल सोशल मीडियावर विविध डाएट आणि फिटनेस ट्रेंड्स पाहायला मिळतात. मात्र, प्रत्येक ट्रेंड आपल्या शरीरासाठी योग्य असेलच असे नाही. त्यामुळे कोणताही नवीन प्रयोग करण्यापूर्वी त्यामागील वैज्ञानिक आधार तपासावा. आरोग्यासाठी सातत्यपूर्ण आणि योग्य सवयी महत्त्वाच्या असल्याचे डॉ. नेने सांगतात.
आवडते पदार्थ खा, पण प्रमाण सांभाळा
निरोगी राहण्यासाठी आवडते पदार्थ पूर्णपणे बंद करण्याची गरज नाही. डॉ. नेने यांनी वडापाव आणि शिऱ्यासारख्या पदार्थांची उदाहरणे दिली. बटाट्याऐवजी रताळे वापरणे किंवा पदार्थ बनवण्याच्या पद्धतीत बदल करणे असे पर्याय निवडता येतात. मात्र, कोणताही पदार्थ खाताना त्याचे प्रमाण नियंत्रित ठेवणे महत्त्वाचे आहे.
