दिवसभरातून किती कप चहा प्यायला पाहिजे?

भारतातच नाही तर जगभरात चहाप्रेमी आपल्याला सापडतील, आपल्यापैकी अनेक जण असे आहेत ज्यांना सकाळी चहा पिण्याची सवय आहे. या लोकांची दिवसभरात अनेक कप चहा प्यायलाही हरकत नसते. ऑफिसमध्ये चहा पिण्याबद्दल विचारलं तर ‘नाही’ म्हणावंसं वाटत नाही. मात्र, चहावर प्रेम करणारे बहुतेक लोक याची काळजी घेत नाहीत की त्याचे जास्त सेवन केल्याने आरोग्याचे मोठे नुकसान होऊ शकते. अशावेळी हा चहा पिण्याची मर्यादा काय आहे, हे जाणून घेणं गरजेचं आहे.

चहामध्ये कॅफिन आणि साखर असते, हे दोन्ही आरोग्यासाठी चांगले मानले जात नाहीत. जर तुम्ही दिवसातून 5 ते 10 कप चहा पित असाल तर कुठेतरी तुम्ही स्वत:चं नुकसान करत आहात, त्यामुळे सावध राहण्याची गरज आहे असं म्हटलं तर वावगं ठरणार नाही.

चहा प्यायल्याने नुकसान होते असे नाही, हे पेय शतकानुशतके पारंपारिक औषधांमध्ये वापरले जात आहे, हे आपल्याला ताजेतवाने करण्यास आणि तणाव दूर करण्यास मदत करते, परंतु जर आपण एका मर्यादेपेक्षा जास्त चहा पिला तर बद्धकोष्ठता, छातीत जळजळ, आतड्यांवर वाईट परिणाम, आम्लपित्त, उच्च रक्तदाब यासारख्या समस्या उद्भवू शकतात.

भारतात चहामध्ये साखर मिसळण्याचा ट्रेंड खूप जास्त आहे आणि दिवसभरात अनेक कप चहा प्यायल्यास साखरेचे सेवन वाढणार हे उघड आहे. अशावेळी तुमच्या रक्तातील साखरेची पातळी वाढेल आणि मग मधुमेहाचा धोका निर्माण होऊ शकतो.

आपल्यापैकी बऱ्याच जणांना माहित आहे की जास्त साखर खाल्ल्याने साखरेचे चरबीमध्ये रूपांतर होऊ लागते, ज्यामुळे लठ्ठपणा वाढतो आणि मग पोटाभोवती चरबी येते. अशा वेळी वजन कमी करणे अवघड होऊन बसते.

चहामध्ये कॅफिन भरपूर प्रमाणात असते, ज्यामुळे ताजेपणा मिळतो, पण तुम्हाला पुन्हा चहाचे व्यसन लागते आणि ज्या दिवशी तुम्ही या पेयाचे सेवन केले नाही, त्या दिवशी तुम्हाला अस्वस्थता आणि डोकेदुखीला सामोरे जावे लागू शकते. चहामुळे झोपही निघून जाते, त्यामुळे तुमच्या झोपण्याच्या पद्धतीवर वाईट परिणाम होऊ शकतो.

दिवसभरात किती कप चहा प्यावा, असा प्रश्नही तुमच्या मनात निर्माण होत असेल तर तुम्ही दररोज 2-3 कप चहा पिऊ शकता, तेही मर्यादित प्रमाणात साखरेने. ज्यांना या सवयीवर नियंत्रण ठेवता येत नाही त्यांना आरोग्याच्या समस्यांना सामोरे जावे लागते.