भांडी चमकवण्यासाठी लिक्विडचा करताय वापर, आजच बंद करा, जाणून घ्या किती घातक

पूर्वी महिला भांडी घासण्यासाठी चुलीतील राखेचा वापर करायच्या, तर काही महिला काळ्या साबणाचा वापर करायच्या… त्यामुळे भांडी देखील स्वच्छ घुतली जायची आणि आरोग्यास देखील कोणता धोका नव्हता.. पण आता चुलीची जागा शेगडीने घेतल्यामुळे राख मिळणं कठीण झालं आहे… अशात महिला भांडी घासण्यासाठी वेगवेगळ्या प्रकारच्या लिक्विडचा वापर करतात. आजच्या काळात गृहिणी भांडी चमकवण्यासाठी नियमितपणे डिशवॉशिंग लिक्विडचा वापर करतात. पण ते आपल्या आरोग्यासाठी खरंच चांगलं आहे का? हे लक्षात ठेवलं पाहिजे की, जर आपण आपली भांडी नीट धुतली नाहीत, तर आपल्या अन्नासोबतच घातक विषारी घटकही आपल्या शरीरात जाऊ शकतात.

भांडी घासण्याचे साबण भांड्यांवरील तेलकटपणा आणि घाण काढण्यासाठी चांगले असतात. त्यांमध्ये बहुतेकदा सर्फॅक्टंट्स नावाची रसायने असतात. आपण पाण्याने कितीही वेळा भांडी धुतली तरी, हे साबणाचे थर पूर्णपणे काढता येत नाहीत. भांड्यांच्या पृष्ठभागावर साबणाचे पातळ थर राहण्याची शक्यता असते.

जेव्हा या भांड्यांमध्ये गरम अन्न दिले जाते, तेव्हा त्यातील रसायने अन्नामध्ये मिसळून आपल्या शरीरात पोहोचतात. सोडियम लॉरिल सल्फेटसारखी रसायने पोटात गेल्यास, गॅस्ट्रायटीस आणि आतड्यांचे विकार यांसारख्या गंभीर आरोग्य समस्या उद्भवू शकतात. कृत्रिम स्वादांमध्ये वापरले जाणारे थॅलेट्स, शरीरातील हार्मोनच्या कार्यात अडथळा आणतात.

लिक्विड थेट भांड्यात ओतू नका. त्याऐवजी, एका कप पाण्यात त्याचे काही थेंब टाकून ते पातळ करणे अधिक सुरक्षित ठरेल. साबणाचे सर्व अवशेष निघून जातील याची खात्री करण्यासाठी स्वच्छ पाण्याने पूर्णपणे धुवा. स्क्रबर वारंवार बदलणे उचित ठरते, कारण त्यावर जीवाणू आणि साबणाचा थर जमा होऊ शकतो. ते धुऊन स्वच्छ करून साठवून ठेवले पाहिजेत.

तेलकटपणा काढण्यासाठी लिंबू आणि व्हिनेगर उत्तम आहेत. त्याचप्रमाणे, काळी पडलेली भांडी स्वच्छ करण्यासाठी बेकिंग सोडा वापरता येतो. रीटा ही एक प्रकारची बेरी असते आणि हा एक नैसर्गिक साबण आहे, जो प्राचीन काळापासून वापरला जात आहे. तो पाण्यात उकळून भांडी धुण्यासाठी वापरता येतो.