जगातील या महागड्या देशांबद्दल माहितीये का? एका आठवड्याच्या ट्रिपसाठी लाखोंचा खर्च, आकडा वाचून हैराण व्हाल

जगात 190 पेक्षा जास्त देश आहेत, मात्र यातील सर्व देश समान नाहीत. प्रत्येक देशाचे चलन आणि त्याची जागतिक बाजारातील किंमत वेगळी आहे. त्यामुळे प्रत्येक देशातील महागाई ही वेगवेगळी आहे. काही देश स्वस्त पर्यटनासाठी ओळखले जातात, तर काही देश हे जगातील सर्वात महागड्या ठिकाणांपैकी आहेत. काही देशांमध्ये एका आठवड्याचा मुक्काम करण्यासाठी होणारा खर्च अनेक ठिकाणी संपूर्ण ट्रिपच्या खर्चापेक्षाही जास्त असू शकतो. जागतिक जीवनमान निर्देशांक आणि पर्यटन अहवालानुसार स्वित्झर्लंड हा जगातील सर्वात महागड्या देशांपैकी एक मानला जातो. याबाबत सविस्तर माहिती जाणून घेऊयात.

एका आठवड्याच्या ट्रिपचा खर्च किती?

जगातील सर्वात महागड्या देशांपैकी एखाद्या देशात सात दिवस राहण्यासाठी, आंतरराष्ट्रीय विमानप्रवासाचा खर्च सोडून प्रति व्यक्ती साधारण दीड लाख ते अडीच लाख रुपये खर्च येऊ शकतो. यात हॉटेल, जेवण, स्थानिक वाहतूक आणि पर्यटनस्थळांना भेट देण्याचा खर्च समाविष्ट आहे.

स्वित्झर्लंड अव्वल स्थानावर

स्वित्झर्लंड हा देश रहिवासी आणि पर्यटक दोघांसाठीही जगातील सर्वात महाग देशांपैकी एक आहे. येथे एका आठवड्याच्या ट्रिपसाठी साधारण 1.75 लाख ते 2.60 लाख रुपये खर्च येतो. म्हणजेच दररोज 25,000 ते 37,000 रुपये खर्च होऊ शकतो. त्यामुळे हा जगातील एक सर्वात महागडा देश आहे.

नॉर्वे

नॉर्वे हा देखील असा देश आहे, जिथे सहलीसाठी मोठ्या बजेटची आवश्यकता असते. येथे सात दिवसांच्या ट्रिपसाठी साधारण 1.61 लाख ते 2.31 लाख रुपये खर्च येऊ शकतो. यामागे हाय व्हॅल्यू अॅडेड टॅक्स (VAT), महाग किराणा सामान आणि वाढलेला मजुरी खर्च ही प्रमुख कारणे आहेत.

बर्मुडा आणि आइसलँड

बर्मुडा आणि आइसलँड हे देश निसर्गसौंदर्यासाठी प्रसिद्ध असले तरी तेवढेच महागडे पर्यटनस्थळ म्हणूनही ओळखले जातात. येथे एका आठवड्याच्या ट्रिपसाठी साधारण 1.47 लाख ते 2.17 लाख रुपये खर्च येतो. म्हणजेच दररोज सरासरी 21,000 ते 31,000 रुपये खर्च अपेक्षित असतो. या ठिकाणी अन्नपदार्थ आणि इतर वस्तू मोठ्या प्रमाणावर आयातीवर अवलंबून असल्यामुळे खर्च अधिक असतो.

अमेरिकेतील मोठी शहरे

न्यूयॉर्क आणि कॅलिफोर्नियासारख्या अमेरिकेतील प्रमुख शहरांना भेट देण्यासाठीही योग्य आर्थिक नियोजन आवश्यक असते. या शहरांमध्ये एका आठवड्याच्या ट्रिपचा खर्च साधारण 1.05 लाख ते 1.75 लाख रुपये दरम्यान येऊ शकतो.

आशियातील सर्वात महाग ठिकाण – सिंगापूर

आकाराने लहान असला तरी सिंगापूर हा आशियातील सर्वात महागड्या देशांपैकी एक आहे. येथे एका आठवड्याच्या ट्रिपसाठी साधारण 84 हजार ते 1.40 लाख रुपये खर्च येऊ शकतो. मर्यादित भूभागामुळे हॉटेल्सचे दर तुलनेने जास्त असल्याने पर्यटनाचा खर्चही वाढतो. त्यामुळे तुम्हालाही वरील देशांमध्ये फिरायला जायचे असेल तर योग्य नियोजन करणे गरजेचे आहे.