Abhijeet Dipke : अभिजीत दीपकेंना भेटण्यासाठी हायप्रोफाईल व्यक्तींची रांग; माजी मुख्यमंत्र्यांनीही मागितली भेटण्याची वेळ
केंद्रीय शिक्षणमंत्र्यांच्या राजीनाम्यानंतर राष्ट्रीय हिरो ठरलेले अभिजीत दीपके संभाजीनगरात परतले आहेत. त्यांच्या यशस्वी आंदोलनामुळे त्यांना भेटण्यासाठी माजी मुख्यमंत्री, मंत्री आणि विविध मान्यवरांची गर्दी होत आहे. उद्धव ठाकरेंनीही संवाद साधत मातोश्रीवर आमंत्रित केले आहे. दीपके यांच्या लोकप्रियतेमुळे राजकीय वर्तुळात त्यांची चर्चा सुरू आहे.
कॉकरोच जनता पार्टीच्या माध्यमातून तरुणांचं आंदोलन उभारून केंद्रीय शिक्षण मंत्र्यांनाच राजीनामा देण्यास भाग पाडल्याने अभिजीत दीपके हे देशाचे हिरो ठरले आहेत. आंदोलन यशस्वी झाल्यानंतर दीपके छत्रपती संभाजीनगरात आले. त्यांचं जंगी स्वागत झालं. अभिजीत सध्या छत्रपती संभाजी नगरात आहेत. त्यामुळे अभिजीत यांना भेटण्यासाठी नेते, कार्यकर्ते आणि सामाजिक कार्यकर्त्यांच्या रांगा लागल्या आहेत. अनेक व्हीआयपी लोक त्यांना भेटायला येत आहेत. एका माजी मुख्यमंत्र्यानेही त्यांना भेटण्याची वेळ मागितली आहे.
छत्रपती संभाजीनगरमध्ये कोकरोच जनता पार्टीचे संचालक अभिजीत दिपके यांच्या आंदोलनाला यश मिळाल्यानंतर त्यांची भेट घेण्यासाठी मान्यवरांची रिघ लागली आहे. माजी खासदार चंद्रकांत खैरे यांनी अभिजीत दिपके यांच्या घरी भेट देत शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांच्याशी दूरध्वनीद्वारे संवाद घडवून आणला. यावेळी उद्धव ठाकरे यांनी अभिजीत यांच्या आई-वडिलांशी संवाद साधत आंदोलनाच्या यशाबद्दल शुभेच्छा दिल्या, तसेच अभिजीत यांच्या लग्नाबाबतही आपुलकीने विचारपूस केली. या अनौपचारिक संवादाची सध्या राजकीय आणि सामाजिक वर्तुळात चांगलीच चर्चा रंगली आहे. एवढेच नव्हे तर उद्धव ठाकरे यांनी दीपके यांना मातोश्रीवर येण्याचं आमंत्रणही दिलं आहे. त्यावर मला सर्वांना भेटायचं आहे. मी मातोश्रीवर जरूर येईल, असं दीपकेंनी उद्धव ठाकरे यांना सांगितल्याचं सूत्रांनी सांगितलं.
मंत्र्याने घेतली भेट
रविवारी राज्याचे सामाजिक न्याय मंत्री संजय शिरसाट यांनी अभिजीत दीपके यांची भेट घेतली. संजय शिरसाट यांचे दीपके कुटुंबीयांशी जुना घरोबा आहे. या निमित्ताने ते दीपके कुटुंबीयांना भेटायला आले होते. या भेटीनंतर शिरसाट यांनी ही राजकीय नव्हे तर कौटुंबिक भेट असल्याचं म्हटलं. यावेळी त्यांनी दीपके कुटुंबीयांना संरक्षण देण्याची मागणी केली आहे. या संदर्भात मुख्यमंत्री देवेंद्र फडणवीस यांच्याशी चर्चा करणार असल्याचंही त्यांनी सांगितलं.
आमदाराकडून कौतुक
शिंदे गटाचे नेते, आमदार बच्चू कडू यांनी काल अभिजीत दीपके यांच्या घरी जाऊन त्यांची भेट घेतली. ही वैयक्तिक भेट आहे. मी संघर्षातून आलेला नेता आहे. त्यामुळे दीपके यांची भेट घेण्यासाठी आलो आहे. या भेटीला राजकीय दृष्टीकोणातून पाहू नये, असं त्यांनी स्पष्ट केलं. दीपके यांनी तरुणांच्या भावनांना हात घातला. त्यांचं कौतुक केलं पाहिजे. पण ही भेट राजकीय भावनेतून पाहू नये, असंही त्यांनी म्हटलं होतं.
