Supreme Court Shivsena Hearing : ‘अरे ये ना, यावच लागणार आहे’ सुप्रीम कोर्टाबाहेर आमने-सामने येताच राऊतांचं शिंदे शिवसेनेच्या नेत्याला ओपन चॅलेंज

शिवसेना पक्ष आणि निवडणूक चिन्ह कोणाचं, यावर सध्या सर्वोच्च न्यायालयात नियमित सुनावणी सुरु झाली आहे. मागच्या दोन-अडीच वर्षांपासून या खटल्याची सुनावणी रखडली होती. सतत सुनावणीच्या तारखा पुढे जात होत्या. पण आता सरन्यायाधीश सूर्यकांत, व्ही. मोहना आणि न्यायमूर्ती जॉयमाला बागची यांच्या खंडपीठासमोर नियमित सुनावणी सुरू आहे. उद्धव ठाकरे गटाच्यावतीने ज्येष्ठ विधीज्ञ कपिल सिब्बल बाजू मांडत आहेत. मागच्या आठवड्यापासून कपिल सिब्बल यांच्याकडून सुप्रीम कोर्टात जोरदार युक्तीवाद सुरु आहे. कपिल सिब्बल रोजच्या सुनावणीत निवडणूक आयोगाच्या निर्णयाची चिरफाड करत आहेत. निवडणूक आयोगाने 2023 साली एकनाथ शिंदे यांच्या गटाला अधिकृत शिवसेना म्हणून मान्यता दिली. त्यामुळे पक्ष आणि निवडणूक चिन्ह धनुष्यबाण एकनाथ शिंदे गटाला मिळालं. उद्धव ठाकरे गटाला मशाल या नव्या निवडणूक चिन्हावर निवडणूक लढवावी लागत आहेत.

निवडणूक आयोगाने विधिमंडळातील संख्याबळाच्या आधारावर एकनाथ शिंदे यांच्या बाजूने निर्णय दिला होता. कपिल सिब्बल यांनी याच मुद्यावरुन निवडणूक आयोगाला कोंडीत पकडलं आहे. विधिमंडळ पक्ष म्हणजे राजकीय पक्ष होत नाही, विधिमंडळ पक्ष हा राजकीय पक्षाचा एक भाग असतो असा कपिल सिब्बल यांचा युक्तीवाद आहे. सर्वोच्च न्यायालय त्यांचा हा युक्तीवाद मान्य करणारी की, त्यांची काही वेगळी भूमिका असेल? हे निवडणूक निकाल आल्यानंतरच स्पष्ट होईल. पण तूर्तास कालच्या सुनावणीनंतर सुप्रीम कोर्टाबाहेर एक गंमतीशीर घटना घडली. त्याचा व्हिडिओ सोशल माीडियावर वेगाने व्हायरल होत आहे.

सुप्रीम कोर्टाबाहेर नेमकं काय घडलं?

सर्वोच्च न्यायालयात रोजची सुनावणी संपल्यानंतर ठाकरे आणि शिंदे गटाकडून त्यांचे नेते मीडियाला बाईट देतात. उद्धव ठाकरे गटाकडून संजय राऊत मीडियाशी बोलतात तर एकनाथ शिंदे गटाकडून खासदार नरेश म्हस्के संवाद साधतात. कालच्या सुनावणीनंतरही सर्वोच्च न्यायालयाबाहेर मीडियाचा असाच गराडा पडला होता. त्यावेळी संजय राऊत आणि नरेश म्हस्के आमने-सामने आले. यावेळी दोघांमध्ये जोरदार खडाजंगी झाली. कपिल सिब्बल यांच्या युक्तीवादामुळे आत्मविश्वास उंचावलेल्या संजय राऊत यांनी नरेश म्हस्के यांना आमने-सामनेच्या चर्चेसाठी बोलावलं.

पण म्हस्केनी नकार दिला. त्यावेळी राऊतांनी त्यांच्यासोबत असलेल्या अनिल देसाईंना ‘घेऊन ये त्याला’ असं म्हटलं. अनिल देसाई नरेश म्हस्केना आणण्यासाठी त्यांच्या दिशेने गेले. पण म्हस्के निघून गेले. त्यावेळी राऊतांनी मीडियाच्या कॅमेऱ्याकडे बघून म्हटलं, ‘अरे ये ना, यावच लागणार आहेना’. हा व्हिडिओ सोशल मीडियावर तुफान व्हायरल होत आहे.