Anjali Damania : काँग्रेसने सुनेत्रा पवारांना ‘गुंगी गुडिया’ म्हणताच अंजली दमानिया खवळल्या; सडेतोड प्रत्युत्तर

राज्याच्या राजकारणात बीडमधील एका व्हिडिओवरून राजकारण पेटलं आहे. बीडच्या कायदा सुव्यवस्थेवरून सुनेत्रा पवारांना प्रश्न विचारणाऱ्या माध्यमांना धनंजय मुंडेंनी थांबवल्याने राजकीय वर्तुळात चर्चांना उधाण आलं आहे. या घटनेवरून काँग्रेसने थेट राष्ट्रवादी काँग्रेसच्या अध्यक्षा सुनेत्रा पवारांनाच लक्ष्य केलं. गुंगी गुडिया म्हणत काँग्रेसने उपमुख्यमंत्री सुनेत्रा पवारांना लक्ष्य केलं. परंतु काँग्रेसने केलेले टीकेचे वार जिव्हारी लागल्याने या वादात सामाजिक कार्यकर्त्या अंजली दमानिया यांनी उडी मारली आहे. अंजली दमानिया यांनी सुनेत्रा पवारांना गुंगी गुडिया म्हणून संबोधणाऱ्या काँग्रेसवरच टीका केली आहे .

अंजली दमानिया यांनी ‘एक्स’ने पोस्ट करत काँग्रेसने सुनेत्रा पवारांवर केलेल्या टीकेचा समाचार घेतला. अंजली दमानिया यांनी काँग्रेसच्या भाषेवर आक्षेप घेतला. अंजली दमानिया म्हणाल्या, ‘गुंगी गुडिया? काय ही भाषा? एका पक्षाला ही भाषा शोभते का? पृथ्वीराज चव्हाण यांना ही भाषा योग्य वाटते का? मी राष्ट्रवादी पक्षाविरुद्ध टोकाचं लढले, पण सुनेत्रा पवारांसाठी वापरलेले हे शब्द अतिशय चुकीचे आहेत. मी याचा तीव्र शब्दात निषेध करते’.

काँग्रेसने नेमकं काय म्हटलं होतं?

काँग्रेसने सुनेत्रा पवारांवर टीका केली होती. काँग्रेसने एक व्हिडिओ पोस्ट करून उपमुख्यमंत्र्यांवर निशाणा साधला होता. काँग्रेसने म्हटलं होतं की, सुनेत्रा पवार, अजून किती दिवस ‘गुंगी गुडिया’ बनून राहतील’.

गुंगी गुडिया?

काय ही भाषा? एका पक्षाला ही भाषा शोभते का? श्री पृथ्वीराज चव्हाण यांना ही भाषा योग्य वाटते का? @prithvrj

मी राष्ट्रवादी पक्षाविरुद्ध टोकाचं लढले, पण सुनेत्रा पवारांसाठी वापरलेले हे शब्द अतिशय चुकीचे आहेत. मी याचा तीव्र शब्दात निषेध करते. https://t.co/FfRrsbKMIj

— Mrs Anjali Damania (@anjali_damania) August 3, 2026

काय आहे प्रकरण?

काही दिवसांपूर्वी बीडच्या पालकमंत्री सुनेत्रा पवार या बीड दौऱ्यावर आल्या होत्या. त्यांनी बीडच्या जिल्हा नियोजन बैठकीला हजेरी लावली. त्यानंतर आयोजित पत्रकार परिषदेत सुनेत्रा पवारांनी माध्यमांशी संवाद साधला. या परिषदेत पत्रकाराने बीडच्या कायदा सुव्यवस्थेवरून सुनेत्रा पवारांना प्रश्न विचारला. परंतु त्याचवेळी धनंजय मुंडे यांनी पत्रकाराला प्रश्न विचारण्यापासून रोखलं. या घटनेच्या व्हिडिओवरून सोशल मीडियावर जोरदार चर्चा झाली. या व्हिडिओवरून काँग्रेसने सुनेत्रा पवार आमि धनंजय मुंडे यांच्यावर टीका केली. धनंजय मुंडे बीडचे हुकूमशहा? सुनेत्रा पवार, अजून किती दिवस ‘गुंगी गुडिया’ बनून राहतील, असं म्हणत टीका केली. परंतु गुंगी गुडिया हा शब्द अंजली दमानिया यांना खटकला. त्यानंतर त्यांनी काँग्रेसचा समाचार घेतला.