भोंदूबाबा अशोक खरातच्या बँकेत सापडले घबाड, FD सोबत तब्बल इतकी मालमत्ता; आकडा पाहून विस्फारतील डोळे!

अध्यात्माच्या नावाखाली महिलांचे लैंगिक शोषण आणि भाविकांची आर्थिक लूट करणाऱ्या भोंदू बाबा अशोक खरातचे अनेक काळे कारनामे सतत समोर येत आहेत. आता खरात फाईल्समध्ये एक मोठी आर्थिक अपडेट समोर आली आहे. मिरगाव येथील श्री शिवनिका संस्थानच्या ऑडिट रिपोर्टमधून अत्यंत धक्कादायक माहिती उघड झाली आहे. या संस्थानाची मालमत्ता अवघ्या काही वर्षांत कोटींच्या घरात कशी पोहोचली, याचा खुलासा समोर आला आहे. त्यामुळे तपास यंत्रणांनाही हादरा बसला आहे.

२०२४ ठरलं गेम चेंजर वर्ष

मिळालेल्या माहितीनुसार, २०२० ते २०२२ या काळात संस्थानची आर्थिक स्थिती अत्यंत बेताची होती. या दोन वर्षांत संस्थानचे उत्पन्न केवळ ४.९० लाखांच्या घरात होते. उलट या संस्थानांमध्ये १.६० ते १.६४ लाखांची तूट नोंदवण्यात आली होती. मात्र २०२४ हे वर्ष या संस्थानसाठी आर्थिक चमत्कार ठरले आहे. या एकाच वर्षात संस्थानवर तब्बल ७६ लाख ९१ हजार ४१६ रुपयांच्या देणग्यांचा वर्षाव झाला आहे. सर्व खर्च वजा करुनही या संस्थानकडे ७०.६६ लाखांची विक्रमी शिल्लक उरली.

मालमत्तेत भरमसाठ वाढ

ऑडिट रिपोर्टनुसार, या संस्थानची मालमत्ता ज्या वेगाने वाढली आहे, त्यामुळे या तपास यंत्रणांचे डोळे विस्फारले आहेत. २०२२ मध्ये या संस्थानांची मालमत्ता ९६ लाख रुपये इतकी होती. त्यानंतर २०२५ पर्यंत या संस्थानाची मालमत्ता १ कोटी ८१ लाख इतकी झाली आहे. तसेच या संस्थेच्या नावे बँकेत २३ लाख ३५ हजार रुपयांच्या मुदत ठेवी (FD) आढळून आल्या आहेत.

आता या शिवनिका संस्थांकडे इतक्या मोठ्या प्रमाणात देणग्यांचा महापूर नेमका आला कुठून? हा पैसा भाविकांच्या लुटीचा आहे की यामागे काही काळेबेरे आहे? याचा छडा आता नाशिक पोलिसांचे विशेष तपास पथक (SIT) करत आहे.

तक्रारदारांचा आकडा वाढला; खरात आज न्यायालयात

दरम्यान अशोक खरातच्या पोलीस कोठडीची मुदत आज संपत असल्याने त्याला पुन्हा न्यायालयात हजर केले जाणार आहे. तपासादरम्यान खरात विरोधात तक्रार करणाऱ्या पीडितांची संख्या सातत्याने वाढत आहे. आतापर्यंत त्याच्यावर लैंगिक अत्याचार, फसवणूक आणि विनयभंगाचे एकूण ६ गुन्हे दाखल झाले आहेत. दैवी शक्तीचे आमिष दाखवून महिलांचे शारीरिक शोषण केल्याचे प्राथमिक तपासात निष्पन्न झाले असून, एसआयटी आता त्याच्या मालमत्तेच्या आणि बँक व्यवहारांच्या मुळाशी जात आहे.