मस्साजोग सरपंच पोटनिवडणुकीचे बिगुल वाजले, संतोष देशमुखांच्या पत्नीला गावकऱ्यांची पसंती, कसा असेल संपूर्ण कार्यक्रम?

बीडच्या केज तालुक्यातील मस्साजोग गावचे सरपंच संतोष देशमुख यांची ९ डिसेंबर २०२४ रोजी निर्घृण हत्या करण्यात आली. यानंतर मस्साजोग गावच्या रिक्त झालेल्या सरपंच पदासाठी आता पोटनिवडणुकीचे बिगुल वाजले आहे. आज ७ एप्रिल २०२६ पासून मस्साजोग गावच्या सरपंच पदाचे उमेदवारी अर्ज दाखल करण्याच्या प्रक्रियेला सुरुवात झाली आहे. त्यामुळे संपूर्ण जिल्ह्याचे लक्ष या निवडणुकीकडे लागले आहे. संतोष अण्णांना खरी श्रद्धांजली म्हणून ही निवडणूक बिनविरोध करून त्यांच्या पत्नी अश्विनी देशमुख यांना संधी द्यावी, अशी भावना गावकऱ्यांकडून व्यक्त होत आहे.

बीड जिल्ह्यातील एकूण ८८ रिक्त जागांसाठी पोटनिवडणुकीची प्रक्रिया प्रशासनाकडून सुरू करण्यात आली आहे. यात जिल्ह्यातील १६ सरपंच आणि ७२ सदस्य अशा एकूण ८८ जागांसाठी पोटनिवडणूक होणार आहे. येत्या ७ एप्रिलपासून १३ एप्रिलपर्यंत मस्साजोगच्या निवडणुकीसाठी उमेदवारी अर्ज दाखल करता येणार आहे. आजपासून या पोटनिवडणुकीसाठी अर्ज दाखल करण्याची प्रक्रिया सुरु झाली असून मस्साजोगचा नवीन कारभारी कोण याकडे संपूर्ण राज्याचे लक्ष लागले आहे.

निवडणुकीचा कार्यक्रम कसा?

• अर्ज दाखल – 7 ते 13 एप्रिल
• अर्जाची छाननी – 15 एप्रिल
• अर्ज मागे घेण्याची तारीख – 17 एप्रिल
• मतदान – 28 एप्रिल
• निकाल – 29 एप्रिल

गावचा कारभारी बिनविरोध निवडला जाणार?

संतोष देशमुख यांच्या निधनामुळे गावात मोठी पोकळी निर्माण झाली आहे. त्यांचे अपूर्ण राहिलेले स्वप्न पूर्ण करण्यासाठी उर्वरित १८ महिन्यांचा कार्यकाळ त्यांच्या कुटुंबालाच मिळावा, अशी मागणी त्यांचे बंधू धनंजय देशमुख यांनी केली आहे. तसेच अनेक ग्रामपंचायत सदस्यांनी आणि विविध पॅनेल प्रमुखांनी स्वतःहून संतोष देशमुख यांच्या कुटुंबाची भेट घेऊन त्यांना बिनशर्त पाठिंबा दर्शवला आहे.

संतोष अण्णांच्या कार्याचा सन्मान राखण्यासाठी इतर इच्छुकांनी अर्ज भरू नयेत आणि ही निवडणूक बिनविरोध करावी, असे आवाहन गावकऱ्यांकडून केले जात आहे. येत्या दोन दिवसांत यावर अंतिम निर्णय होण्याची शक्यता आहे. त्यामुळे सध्या राजकीय वर्तुळात मस्साजोगच्या पोटनिवडणुकीची मोठी चर्चा पाहायला मिळत आहे.

मकोका न्यायालयात सुनावणी: उज्ज्वल निकमच चालवणार खटला

दरम्यान एकीकडे निवडणूक प्रक्रिया सुरु असताना दुसरीकडे संतोष देशमुख हत्या प्रकरणाची बीडच्या विशेष मकोका न्यायालयात आज महत्त्वाची सुनावणी होत आहे. या खटल्यात कायदेशीर पेच निर्माण करण्याचा आरोपींचा प्रयत्न न्यायालयाने हाणून पाडला आहे. आरोपींनी विशेष सरकारी वकील उज्ज्वल निकम यांना बदलण्यासाठी केलेला अर्ज न्यायालयाने फेटाळून लावला आहे. यामुळे आता खटल्याच्या प्रत्यक्ष युक्तीवादाला वेग येणार आहे.

आज न्यायालयात सर्व साक्षी-पुराव्यांची यादी सादर केली जाणार आहे. त्यामुळे आरोपींच्या मालमत्ता जप्तीचा निर्णय देखील न्यायालयाने राखून ठेवला आहे. आरोपींचा उद्देश केवळ केस लांबवण्याचा होता, मात्र आता पुढील ६ महिन्यांपासून एका वर्षाच्या आत निकाल लागून आरोपींना कडक शिक्षा होईल,” असा विश्वास धनंजय देशमुख यांनी व्यक्त केला आहे.