मला तुमची मुलगी शोभत नाही, पिस्तुल दाखवून धमकावले! लग्नाला 11 दिवस बाकी असतानाच पीएसआयचा धक्कादायक कारनामा

राज्यातील बीड तालुका हा कायमच कोणत्या ना कोणत्या कारणामुळे चर्चेत राहिला आहे. आता या तालुक्यातून अतिशय धक्कादायक माहिती समोर आली आहे. लग्नाला अवघे काही दिवस शिल्लक असताना नवरदेवाने लग्नाला नकार दिला. त्याने थेट ‘तुमची मुलगी मला शोभत नाही’ असे म्हणत लग्नाला नकार दिला आहे. तर मुलीच्या कुटुंबीयांना पिस्तुलचा धाक दाखवून धमकावल्याचा गंभीर आरोपही करण्यात आला आहे. या प्रकरणी मुलीच्या कुटुंबीयांनी पोलिसांत धाव घेतली आहे.

नेमका प्रकार काय?

बीडमध्ये कार्यरत असलेले पोलीस उपनिरीक्षक पवन निंबाळकर यांचा विवाह ठरला होता. लग्नाची जोरदार तयारी सुरू होती आणि विवाहाला अवघे ११ दिवस शिल्लक होते. मात्र, ऐनवेळी पीएसआय निंबाळकर यांनी ‘मुलगी मला शोभत नाही’ असे कारण पुढे करत लग्नास नकार दिला. मुलीच्या कुटुंबीयांनी दिलेल्या माहितीनुसार, त्याने यावेळी सरकारी पिस्तुलचा धाक दाखवत त्यांना धमकावले. या प्रकारामुळे मुलीच्या कुटुंबाला मोठा मानसिक आणि आर्थिक धक्का बसला आहे.

लाखो रुपयांचा खर्च पाण्यात

या घटनेबाबत बोलताना मुलीचे वडील ज्ञानेश्वर जरांगे यांनी आपली व्यथा मांडली. त्यांनी सांगितले की, “मुलीच्या साखरपुड्यालाच आमचे ५ लाख रुपये खर्च झाले होते. लग्नाची तारीख जवळ आल्यामुळे आम्ही मुलीला देण्यासाठी भांडी, फर्निचर आणि इतर सर्व सामानाची खरेदी केली होती. साखरपुडा आणि खरेदी असा एकूण मिळून आमचा १४ ते साडेचौदा लाखांपर्यंतचा खर्च झाला आहे. लग्नाला केवळ ११ दिवस राहिले असताना त्याने अचानक नकार दिल्याने आमचे मोठे नुकसान झाले आहे.”

दोन्ही बाजूंनी पोलिसांत तक्रार

या धक्कादायक प्रकारानंतर मुलीच्या कुटुंबीयांनी न्यायासाठी चकलांबा पोलीस ठाण्यात धाव घेतली. त्यांच्या तक्रारीवरून पोलीस उपनिरीक्षक पवन निंबाळकर यांच्या विरोधात फसवणुकीचा गुन्हा दाखल करण्यात आला आहे. तर दुसरीकडे, पोलीस उपनिरीक्षकाच्या बाजूने देखील एक तक्रार दाखल करण्यात आल्याची माहिती समोर आली आहे. “आमच्या मुलीला न्याय मिळावा आणि लग्नाच्या तयारीसाठी आमचा जो काही खर्च झाला आहे, तो आम्हाला परत मिळावा,” अशी मागणी मुलीचे वडील ज्ञानेश्वर जरांगे यांनी केली आहे. एका पोलीस अधिकाऱ्यानेच अशा प्रकारचा कारनामा केल्याने बीड जिल्ह्यात खळबळ उडाली असून, पोलीस या प्रकरणाचा पुढील तपास करत आहेत.