संतोष देशमुख हत्या प्रकरणी मोठी अपडेट; फरार आरोपी कृष्णा आंधळेची संपत्ती जप्त करण्याचे आदेश

Santosh Deshmukh Murder Case : बीडच्या केज तालुक्यातील मस्साजोग गावचे सरपंच संतोष देशमुख यांच्या हत्येनंतर मराठवाड्यातील राजकारण तापले आहे. या घटनेमुळे सातत्याने आरोप-प्रत्यारोप केले जात आहेत. संतोष देशमुख यांच्या हत्येला दोन महिन्यांपेक्षा जास्त दवस उलटले आहेत. या प्रकरणातील सात आरोपींवर मकोका लावण्यात आला आहे. या हत्या प्रकरणातील मास्टरमाईंड असलेल्या वाल्मिक कराडवरही मकोका लावण्यात आला आहे. वाल्मिक कराडवर संतोष देशमुखांच्या हत्या प्रकरणाचेही आरोप आहेत. तर दुसरीकडे या प्रकरणातील आरोपी कृष्णा आंधळे फरार आहे. आता फरार असलेल्या कृष्णा आंधळेची संपत्ती जप्त करण्याचे आदेश देण्यात आले आहे.

संतोष देशमुख यांच्या हत्येचा तपास करण्यासाठी पोलीस, एसआयटी आणि सीआयडी काम करत आहे. बीड जिल्ह्यातील नेत्यांच्या मागणीनंतर एसआयटी स्थापन करण्यात आली. तसेच हा तपास सीआयडीकडे देण्यात आला. त्यानंतर तपास वेगाने सुरु आहे. या प्रकरणी मुख्य आरोपी सुदर्शन घुले, सुधीर सांगळे, जयराम चाटे, विष्णू चाटे. प्रतिख घुले, महेश केदार यांना अटक करण्यात आली. त्यांच्यावर मकोकाही लावण्यात आला. पण कृष्णा आंधळेचा अनेक ठिकाणी शोध घेऊनही तो अजून सापडलेला नाही. त्याच्यावरही मकोका लावण्यात आला. त्याला फरार घोषित करण्यात आले.

कृष्णा आंधळेच्या नावावर 5 वाहने

तसेच आता कृष्णा आंधळेची संपत्ती जप्त करण्याचे आदेश कोर्टाने दिले आहेत. सीआयडी अधिकाऱ्यांनी कृष्णा आंधळेंची संपत्ती जप्त करण्यासाठी अर्ज दाखल केला होता. या अर्जावर बीड कोर्टाने आज आदेश दिले आहेत. या आदेशामध्ये कृष्णा आंधळेची संपत्ती जप्त करा, असे आदेश देण्यात आले आहे. कृष्णा आंधळेच्या नावावर 5 वाहने आहेत. तसेच धारुर आणि केजमध्ये बँक खाते आहेत. हे सर्व जप्त करण्याचे आदेश देण्यात आले आहे.

कृष्णा आंधळे कोण?

“कृष्णा आंधळे हा मुलगा संभाजीनगरला पूर्वी पोलीस भरतीची तयारी करत होता. ती तयारी करता करता तो गुन्हेगारीकडे वळला. यापूर्वी त्याने संभाजीनगरलाही काही गुन्हे केलेले आहेत. त्याच्या घरी गरीबी आहे. पत्र्याचं घर आहे. त्याला फारसं काही घराबद्दल, आई वडिलांबद्दल ओढ नाही. तो अनेक दिवस संपर्कविना राहतो असा त्याची पार्श्वभूमी आहे. त्यामुळे कदाचित तो आता एक राज्य सोडून दुसऱ्या राज्यात, दुसरं राज्य सोडून तिसऱ्या राज्यात किंवा आणखी नेपाळ वैगरे अशा ठिकाणी गेला आहे का? याचा तपास सुरु आहे. तो सध्या फरार आहे.” अशी माहिती सुरेश धस यांनी दिली आहे.