फलटण महिला डॉक्टर मृत्यू प्रकरणात मोठं ट्विस्ट, तळहातावरील अक्षर कोणाचं? खळबळजनक माहिती समोर
फलटणमध्ये एका महिला डॉक्टरने आपलं जीवन संपवलं, या घटनेनं संपूर्ण राज्यभरात खळबळ उडाली आहे, दरम्यान या प्रकरणात आता मोठी बातमी समोर आली असून, प्रकरणात मोठं ट्विस्ट आलं आहे.
सातारा जिल्ह्यातील फलटणमध्ये एका महिला डॉक्टरने आत्महत्या केल्याची घटना घडली आहे, या डॉक्टरने हॉटेलमध्ये गळफास घेऊन आपलं आयुष्य संपवलं, या घटनेनं राज्यभरात खळबळ उडाली आहे. दरम्यान मृत्यूपूर्वी या डॉक्टरने आपल्या तळहातावर एक सुसाईड नोट लिहिली होती, त्या सुसाईड नोटमध्ये तिने पीएसआय गोपाळ बदने आणि प्रशांत बनकर यांच्यावर गंभीर आरोप केले आहेत. गोपाळ बदने याने आपल्यावर अत्याचार केल्याचं या डॉक्टरने सुसाईड नोटमध्ये म्हटलं आहे, तर प्रशांत बनकर हा आपला शारीरीक आणि मानसिक छळ करत होता असाही आरोप या सुसाईड नोटमध्ये करण्यात आला आहे. आता या प्रकरणावर प्रतिक्रिया देताना माजी मंत्री धनंजय मुंडे यांनी गंभीर आरोप केले आहेत, तसेच नवी माहिती देखील समोर आली आली आहे.
नेमकं काय म्हणाले धनंजय मुंडे?
वैद्यकीय अधिकाऱ्यांच्या त्रासाला कंटाळून हा प्रकार घडलेला आहे. कुटुंबातला एकही व्यक्ती मानायला तयार नाही की या महिला डॉक्टरने आत्महत्या केली आहे म्हणून, घरच्यांना असं वाटत आहे की ही आत्महत्या घडवून आणली गेली आहे, त्याची चौकशी झाली पाहिजे अशी मागणी धनंजय मुंडे यांनी केली आहे. या घटनेसंदर्भात मी माननीय मुख्यमंत्र्यांना सांगितलेलं आहे, या प्रकरणात एसआयटी नेमावी, आणि या एसआयटीमध्ये सिनियर महिला आयपीएस अधिकारी नियुक्त कराव्यात असंही यावेळी मुंडे यांनी म्हटलं आहे.
दरम्यान पुढे बोलताना मुंडे म्हणाले की, मृत महिला डॉक्टरच्या बहिणीचं म्हणणं आहे की, हे हस्ताक्षर तिचं नाहीच आहे. त्यामुळे पोलिसांनी या सर्व प्रकरणाची चौकशी केली पाहिजे, सर्वांचे सीडीआर काढले पाहिजेत, सरळ-सरळ खासदारांच्या दोन पीएंचा यामध्ये संबंध जोडला गेला, आहे असंही यावेळी धनंजय मुंडे यांनी म्हटलं आहे.
दरम्यान या प्रकरणात आरोपी असलेल्या प्रशांत बनकर याला पोलिसांनी आधीच अटक केली होती, तर दुसरा आरोपी निलंबित पीएसआय गोपाळ बदने हा देखील पोलीस ठाण्यात हजर झाला, त्याला पोलिसांनी अटक केली आहे.
