BJP-Shivsena : भाजप नेत्या श्वेता महालेंचे शब्द शिंदेंच्या आमदाराच्या मनाला भिडले, लगेच पलटवार, जिल्ह्यातील अनेक पळून गेलेल्या मुली मी..
BJP-Shivsena : सध्या महायुतीच्या दोन आमदारांमध्ये जोरदार जुंपली आहे. बिहार झालाय हे शब्द मनाला भिडले. लगेच एकनाथ शिंदे यांच्या शिवसेना आमदाराने आपल्या खास स्टाइलमध्ये प्रत्युत्तर दिलं.
गणेश सोलंकी, प्रतिनिधी : बुलढाणा जिल्ह्याच्या स्थानिक राजकारणात चिखलीच्या भाजप आमदार श्वेता महाले आणि एकनाथ शिंदे शिवसेनेचे आमदार संजय गायकवाड यांच्यात जोरदार सामना रंगला आहे. दोन्ही बाजूंकडून शाब्दीक द्वंद सुरु आहे. परस्परांच्या मतदारसंघात जाऊन जंगी वाढदिवस साजरा करण्यावरुन या सर्व वादाची सुरुवात झाली. “बुलढाण्याचा बिहार झाला आहे. आपल्याला पुन्हा बिहारचा शांत बुलढाणा करायचा आहे. यापुढे बुलढाणा मतदारसंघात कुठेही हुकूमशाही दडपशाही अजिबात चालणार नाही” असं श्वेता महाले म्हणाल्या. विजुभाऊंच्या (सत्कार कार्यक्रमाचे आयोजक ) पत्नीलाही उचलून नेण्याची व गायब करण्याची भाषा झाली, असा गंभीर आरोपही श्वेता महाले यांनी केला. त्यावर आता आमदार संजय गायकवाड यांनी उत्तर दिलं आहे.
बुलढाण्याचा बिहार झाला म्हणतात, पण कमीत कमी आरोप करताना इतिहास पाहिला पाहिजे. ज्या माणसाने मुलींचे संसार बसवण्यासाठी स्वतःचे रक्त सांडले. साडेसात हजार मुलींचे संसार बसविले असा दावा संजय गायकवाड यांनी केला. “जिल्ह्यातील अनेक पळून गेलेल्या मुली संजय गायकवाड यांनी परत आणल्या. एवढा विश्वास मुलींच्या आई वडिलांना आहे. असे असताना उपट सुंबे आरोप करायचे आणि बदनाम करायचे” असं प्रत्युत्तर संजय गायकवाड यांनी दिलं.
हे वक्तव्य संजय गायकवाड यांच्या जिव्हारी लागलं
“रात्री बारा वाजता एकटी मुलगी बुलढाण्यामध्ये फिरू शकते आणि याला जर ते बिहार समजत असतील तर मला त्यांच्या बुद्धीची कीव येते” असं संजय गायकवाड म्हणाले. चिखलीच्या भाजप आमदार श्वेता महाले यांचा बुलढाणा मतदार संघातील गावात सत्कार झाला. हा सत्कार स्वीकारताना श्वेता महाले यांनी आमदार संजय गायकवाड यांना डिवचलं. बुलढाण्याचा बिहार झाला असं त्या म्हणाल्या. त्यांचं हे वक्तव्य संजय गायकवाड यांच्या भरपूर जिव्हारी लागलं.
..तर बाई बापासारखे शरीर कुठून आणणार
काही दिवसांपूर्वी श्वेता महाले त्यांच्या वाढदिवसाच्या निमित्ताने बुलढाण्यात आल्या होत्या. यावेळी जोरदार सेलिब्रेशन झालेलं. आमदार महाले ‘बाप तो बाप रहेगा, या गाण्यावर थिरकलेल्या. त्यांनी बाण सोडतानाची Action करुन आमदार संजय गायकवाड यांना डिवचलेलं. त्यावर माध्यमांशी बोलताना संजय गायकवाड म्हणालेले की, “बाप तो बाप रहेगा हे माणसाने बोललेले बरं. पण एखाद्या बाईने म्हटले की, बाप आहे… तर बाई बापासारखे शरीर कुठून आणणार” असं वादग्रस्त वक्तव्य केलेलं.
