८० वर्षीय आजीबाई गजानन महाराजांच्या दर्शनाला आल्या; गर्दीत ट्रेनमध्ये चढू शकल्या नाही तेव्हा…

बुलढाणा : प्रवास करताना कधीकधी काही गमतीजमती होत असतात. अशावेळी काही जण घाबरून जातात. कारण त्यांना प्रवासाबद्दल फारशी माहिती नसते. अशीच काहीशी घटना शेगावमध्ये घडली. चंद्रपूरच्या सयाबाई झांबरे या गजानन महाराज यांच्या दर्शनासाठी आल्या होत्या. दर्शन झाले. परतीचा प्रवास करायचा होता. ट्रेनमध्ये गर्दी होती. सयाबाई यांना गर्दीत प्रवास करायची सवय नव्हती. त्यांच्यासोबतचे ट्रेनमध्ये बसले. ट्रेन सुरू झाली. सयाबाई खालीच राहिल्या. धावत्या ट्रेनमध्ये जा बसू शकत नव्हत्या. त्यामुळे सयाबाई प्रचंड घाबरल्या. आता आपण घरी कसे जाणार, याची चिंता त्यांना लागली. तेवढ्यात आरपीएफ जवान त्यांच्या मदतीला धावून आले. त्यामुळे त्या परतीचा प्रवास करू शकल्या.

आजी ट्रेनमध्ये चढू शकल्या नाही

चंद्रपूर येथील सयाबाई झांबरे ह्या 80 वर्षीय आजी आपल्या गावातील वृद्ध महिलांसोबत काल शेगावच्या गजानन महाराज यांच्या दर्शनाला आल्या होत्या. मात्र नवजीवन एक्स्प्रेसने परत जाताना ट्रेनमध्ये गर्दी असल्याने सयाबाई झांबरे यांना ट्रेन मध्ये चढताच आले नाही. ट्रेन निघून गेल्यावर आजी खालीच राहिल्या. यावेळी घाबरलेल्या अवस्थेत आजीने शेगाव स्टेशनवर ड्युटीवर असलेले आरपीएफ जवान रंजन तेलंग यांचा हात पकडून आजीने घडलेला प्रकार सांगितला.

कुटुंबीयांच्या स्वाधीन केले

यावेळी आरपीएफ जवान तेलंग यांनीही आजीला चहा, नाश्ता देऊन विचारपूस केली. वरिष्ठांच्या कानावर सर्व हकिकत टाकली आणि आजीला घरी पोहचवण्याचा निर्णय घेतला. एवढेच काय सर्व सूत्र हलले आणि आजीला ओखापुरी एक्स्प्रेसमध्ये आजीला बसून देत समोर त्यांच्या कुटुंबाशी बोलून त्यांना त्यांच्या ताब्यात दिले. अशाप्रकारे आजीला घरी पोहचवण्याचा आनंद आरपीएफ जवान रंजन तेलंग यांना तर झालाच शिवाय त्यांच सर्वत्र कौतुकही होत आहे.