नको तिथे स्टंटबाजी करणे महागात पडले, चालत्या बोटीतून पाण्यात उडी मारली अन्…

बुलढाणा : मित्रांसोबत पिकनिकला गेलेल्या तरुणलाा स्टंटबाजी करणे चांगलेच महागात पडले आहे. स्टंटबाजी करताना तरुण पाण्यात बुडाल्याची घटना बुलढाणा जिल्ह्यातील मेहकर तालुक्यात घडली. रोशन इंगळे असे मयत तरुणाचे नाव आहे. घटनेची माहिती मिळताच तात्काळ प्रशासनाने तात्काळ घटनास्थळी धाव घेत शोध मोहीम सुरू केली. सायंकाळपर्यंत रोशनचा मृतदेह सापडला नव्हता. आज पुन्हा शोध मोहीम राबवण्यात येणार आहे. स्टंटबाजी करण्याच्या नादात रोशनने पाण्यात उडी घेतली आणि तो बुडाला. या घटनेमुळे इंगळे कुटुंबावर दुःखाचा डोंगर कोसळला आहे.

नौका विहार करताना स्टंटबाजी

मेहकर तालुक्यातील हिवरा आश्रम येथील विवेकानंद स्मारक आणि कन्याकुमारी परिसर पाहण्यासाठी काल दुपारी चिखली तालुक्यातील पाच युवक गेले होते. त्याठिकाणी नौका विहार करताना नावेमध्ये काही मुली सुद्धा होत्या. यावेळी मुलींसमोर शाईनिंग मारण्यासाठी रोशन इंगळे आणि आदेश इंगळे हे दोन तरुण बेटाच्या मागे 50 फूट अंतरावर नौका चालू असताना स्टंटबाजी करत होते. बोट चालकाने त्यांना स्टंटबाजी करू नका म्हणून सांगितले.

बेपत्ता तरुणाचा शोध सुरु

मात्र त्या दोघांनी बोट चालकाच्या सांगण्याकडे दुर्लक्ष करत चालत्या बोटीतून पाण्यात उड्या घेतल्या. तरुण पाण्यात पडल्याचे पाहताच चालकाने बोट पुन्हा पाण्यात आणली आणि तरुणांना वाचवण्याचा प्रयत्न केला. यावेळी आदेश इंगळे या तरुणाला वाचवण्यात नौका चालकाला यश आले. मात्र 22 वर्षीय रोशन इंगळे हा तरूण पाण्यात बुडाला. त्याचा अद्यापही शोध सुरू आहे.