महायुती सरकारचे 100 दिवसांचे प्रगती पुस्तक समोर, फडणवीस-शिंदे-अजित दादांचा विभाग कितव्या स्थानावर?

मुख्यमंत्री देवेंद्र फडणवीस यांनी आज महायुती सरकारचे प्रगती पुस्तक सर्वसामान्य जनतेसमोर मांडले आहे. राज्य सरकारच्या 100 दिवसांच्या कार्यकालीन सुधारणा कार्यक्रमाचा निकाल जाहीर करण्यात आला आहे. मुख्यमंत्री देवेंद्र फडणवीसांनी ट्वीट करत याबद्दलची माहिती दिली आहे. यात त्यांनी कोणते विभाग अव्वल स्थानावर, कोणाची किती टक्के कामे पूर्ण झाली आहेत, याबद्दलची माहिती सांगितली आहे. या यादीत एकूण राज्यातील ४८ विभागांच्या प्रगतीचा आढावा देण्यात आला आहे.

देवेंद्र फडणवीस काय म्हणाले?

याबद्दल देवेंद्र फडणवीसांनी स्वत: ट्वीट केले आहे. राज्यात नवीन महायुती सरकार स्थापन झाल्यानंतर शासनाच्या सर्व 48 विभागांनी 100 दिवसांचा धोरणात्मक बाबींचा कार्यक्रम हाती घेऊन महत्त्वाची नवीन धोरणे, दूरगामी निर्णय व लोकाभिमुख उपक्रमांची आखणी सुरू केली. गेल्या 100 दिवसात या सर्व विभागांनी निश्चित केलेल्या 902 धोरणात्मक उद्दिष्टांपैकी 706 उद्दिष्टे (78%) पूर्णतः साध्य केली आहेत तर उर्वरित 196 उद्दिष्टे पूर्ण होईपर्यंत संबंधित विभाग आपले काम चालूच ठेवतील, असे देवेंद्र फडणवीस म्हणाले.

एकूण 48 विभागांपैकी 12 विभागांनी आपली 100% उद्दिष्ट पूर्तता केली आहे तर आणखी 18 विभागांनी 80% पेक्षा जास्त उद्दिष्टे साध्य केली आहेत. सविस्तर माहिती तुम्हाला http://maharashtra.gov.in या संकेतस्थळावर पाहता येईल. या परिवर्तनशील व सर्वंकष विकासाच्या वाटचालीच्या मोहिमेत सर्व विभागांनी केलेल्या अतिशय प्रभावी कामगिरीबद्दल मी त्यांचे मनःपूर्वक अभिनंदन करतो आणि त्यांनी भविष्यात सुद्धा अशीच चांगली कामगिरी करावी, यासाठी त्यांना खूप खूप शुभेच्छा देतो, असे देवेंद्र फडणवीसांनी म्हटले.

राज्यात नवीन महायुती सरकार स्थापन झाल्यानंतर शासनाच्या सर्व 48 विभागांनी 100 दिवसांचा धोरणात्मक बाबींचा कार्यक्रम हाती घेऊन महत्त्वाची नवीन धोरणे, दूरगामी निर्णय व लोकाभिमुख उपक्रमांची आखणी सुरू केली.@Dev_Fadnavis https://t.co/MB4JhxYHeu

— DD Sahyadri News | सह्याद्री बातम्या (@ddsahyadrinews) May 1, 2025

पाहा सर्व विभागांची यादी

दरम्यान मुख्यमंत्री देवेंद्र फडणवीसांकडे सध्या गृहखातं आहे. त्यांच्या गृहखात्याने चांगली कामगिरी केली आहे. ते दुसऱ्या क्रमांकावर असून त्यांनी ३१ उद्दिष्टे पूर्ण केली आहेत. तर उपमुख्यमंत्री एकनाथ शिंदे यांच्याकडे नगरविकास आणि गृहनिर्माण खाते आहे. यातील नगरविकास खात्यातील ३४ उद्दिष्टांपैकी २९ उद्दिष्टे एकनाथ शिंदेंनी पूर्ण केली आहेत. तसेच गृहनिर्माण खात्यातील ६६ पैकी ४५ उद्दिष्टे पूर्ण झाली आहे. तसेच अजित पवारांकडे अर्थ आणि राज्य उत्पादन शुल्क हे दोन विभाग आहेत. यात राज्य उत्पादन शुल्कातील ६ पैकी ५ उद्दिष्टे पूर्ण झाली आहेत.