महायुतीत पदवीधर मतदरासंघाच्या उमेदवारीवरून संघर्ष; भाजपकडून कोणाचे ‘लाड’ होणार? राष्ट्रवादीच्या मागणीने ट्विस्ट

लोकसभा, विधानसभा, स्थानिक स्वराज्य संस्थाच्या निवडणुकीनंतर आता पदवीधर मतदारसंघाच्या निवडणुकीसाठी पडघम वाजू लागले आहेत. या निवडणुकीसाठी भाजप, सुनेत्रा पवारांची राष्ट्रवादी, शिंदे गटाने जोरदार प्रयत्न सुरू केले आहेत. महायुतीमधील पक्षांमध्येच संघर्ष समोर येत आहे. त्याचबरोबर पक्षांतर्गत देखील कोणाला संधी द्यायची,यावरून आरोप प्रत्यारोप सुरू झाले आहेत. उमेदवारीवरून झालेल्या संघर्षात आता राष्ट्रवादीच्या मागणीने ट्विस्ट निर्माण झाला आहे.

पुणे पदवीधर मतदारसंघातील निवडणुकीच्यी उमेदवारीवरून महायुतीमधील भाजप आणि राष्ट्रवादीत संघर्ष पाहायला मिळत आहे. राष्ट्रवादीचे इच्छुक उमेदवार प्रताप माने यांनी आमदार शरद लाड यांच्यावर निशाणा साधला आहे. पदवीधर मतदारसंघातून निवडून आले. मात्र पदवीधरांच्या प्रश्नावर विधान परिषद आणि विधानसभेत आमदार अरुण लाड यांनी कधीच आवाज उठवला नाही,असा आरोप पुणे पदवीधर मतदारसंघाचे राष्ट्रवादी पक्षाचे इच्छुक उमेदवार प्रताप माने यांनी केला आहे. आमदार अरुण लाड यांच्या कामगिरी पदवीधरांना चांगलीच माहित आहे. त्यामुळे त्यांना येणाऱ्या निवडणुकीत पदवीधर उत्तर देतील,असे देखील माने यांनी स्पष्ट केले आहे. सांगलीमध्ये पुणे पदवीधर मतदारसंघाच्या नोंदणी संदर्भात मंत्री हसन मुश्रीफ यांच्या उपस्थितीमध्ये राष्ट्रवादी पक्षाच्या पार पडलेल्या आढावा बैठकीत माने बोलत होते.

मंत्री हसन मुश्रीफ काय म्हणाले?

पुणे पदवीधर मतदारसंघासाठी आम्ही अश्वमेध सोडला आहे आणि पुणे पदवीधर मतदारसंघाची जागा पदरात पाडून घेऊ,असा विश्वास राष्ट्रवादी काँग्रेस पक्षाचे नेते वैद्यकीय शिक्षण मंत्री हसन मुश्रीफ यांनी व्यक्त केला आहे. तसेच पुणे पदवीधर मतदारसंघाचे आमदार अरुण लाड यांनी त्यांच्या मुलाची उमेदवारी थांबवून, प्रताप माने यांना दिलेले शब्दाप्रमाणे पाठिंबा द्यावा,असे आवाहन देखील यावेळी मंत्री मुश्रीफ यांनी केले आहे. पुणे पदवीधर मतदारसंघाच्या नोंदणीसाठी सांगलीमध्ये मंत्री हसन मुश्रीफ यांच्या उपस्थितीमध्ये राष्ट्रवादी काँग्रेस पक्षाची आढावा बैठक पार पडली. यावेळी ते बोलत होते. तर पुणे पदवीधर मतदारसंघाच्या जागेवरून राष्ट्रवादीच्या भूमिकेमुळे महायुतीत राष्ट्रवादी आणि भाजपामध्ये संघर्ष वाढणार आहे,हे आता नक्की झाले आहे .