अखेर काँग्रेसने संजय निरुपम यांना बाहेरचा रस्ता दाखवलाच, पक्षाची मोठी कारवाई

काँग्रेस पक्षाकडून अखेर माजी खासदार संजय निरुपम यांच्यावर मोठी कारवाई करण्यात आली आहे. काँग्रेस हायकमांडने संजय निरुपम यांची पुढच्या 6 वर्षांसाठी पक्षातून हकालपट्टी केली आहे. काँग्रेसकडून ज्येष्ठ नेते के. सी. वेणुगोपाल यांच्या स्वाक्षरीचं प्रसिद्धीपत्रक जारी करण्यात आलं आहे. यामध्ये संजय निरुपम यांच्यावर निलंबनाची कारवाई करण्यात आल्याचं स्पष्ट करण्यात आलं आहे. पक्षशिस्तीचं पालन न करणं आणि पक्षाविरोधात वक्तव्ये करणे यामुळे काँग्रेस अध्यक्षांनी संजय निरुपम यांच्यावरील निलंबणाच्या कारवाईचा प्रस्ताव मान्य केला आहे. निरुपम यांना आजपासून तातडीने पुढच्या 6 वर्षांसाठी पक्षातून निलंबित करण्यात येत आहे, असं प्रसिद्धीपत्रकात म्हटलं आहे.

संजय निरुपम हे काँग्रेसचे मुंबईतील आक्रमक नेत्यांपैकी एक नेते आहेत. ते मुंबई काँग्रेसचे अध्यक्ष देखील राहिले आहेत. संजय निरुपम एकेकाळी शिवसेनेत होते. त्यांनी शिवसेनेतून काँग्रेसमध्ये प्रवेश केला होता. त्यांनी बरेच वर्ष काँग्रेसमध्ये निष्ठेने काम केलं आहे. त्याची जाणीव काँग्रेस पक्षालाही होती. काँग्रेसच्या स्टार प्रचारक नेत्यांच्या यादीत ते होते. पण उत्तर पश्चिम मुंबई मतदारसंघात शिवसेना ठाकरे गटाने उमेदवारी जाहीर केल्यानंतर संजय निरुपम यांनी खूप आक्रमक पवित्रा घेतला होता. त्यांनी ठाकरे गटावर सडकून टीका केली होती. त्यामुळेच त्यांच्यावर आता ही कारवाई करण्यात आली आहे.

संजय निरुमप यांचा पक्षाला इशारा

ठाकरे गटाने उत्तर पश्चिम मुंबई लोकसभा मतदारसंघातून अमोल कीर्तिकर यांना उमेदवारी जाहीर केली होती. पण त्यांच्या उमेदवारीला संजय निरुपम यांनी विरोध केला होता. याउलट त्यांनी त्या मतदारसंघावर दावा केला होता. विशेष म्हणजे यासाठी त्यांनी आपल्या पक्षाला आठवड्याची मुदत दिली होती. पक्षाने आपल्या मागणीचा विचार केला नाही तर आपण वेगळा निर्णय घेऊ, असा इशारा त्यांनी दिला होता. त्यांच्या या इशाऱ्याचा उद्या शेवटचा दिवस होता. पण त्याआधीच त्यांची पक्षातून हकालपट्टी करण्यात आली आहे.

निरुपम शिंदे गटात जाणार?

काँग्रेसची आज मुंबईत बैठक पार पडली. या बैठकीतच संजय निरुपम यांचं नाव स्टार प्रचारकांच्या यादीतून काढण्याचा निर्णय घेण्यात आला होता. तसेच निरुपम यांची पक्षातून हकालपट्टी करण्याचा प्रस्तावही तयार करण्यात आला होता. हा प्रस्ताव दिल्लीत हायकमांडला पाठवण्यात आला होता. यानंतर संजय निरुपम यांनी ट्वीट करत आपण उद्या आपला निर्णय घोषित करणार, असं जाहीर केलं. यानंतर पक्षाकडून त्यांच्यावर अधिकृत निलंबनाची कारवाई करण्यात आल्याची माहिती समोर आली आहे. निरुपम शिंदे गटाच्या वाटेवर असल्याची सध्या चर्चा आहे. याबाबत उद्या मोठा खुलासा होऊ शकतो.