लोकांना वाईट वाटलं तर वाटू द्या, डीजे बंदी झालीच पाहिजे, शिंदेंच्या मंत्र्याची रोखठोक भूमिका!

सध्या राज्यामध्ये गणेशोत्सवाच्या आगमनाचे वेध लागले आहेत. पुढील आठवड्यामध्ये गणरायाचं आगमन होणार आहे. त्यापूर्वीच गेल्या आठवड्यापासून राज्यातील राजकीय वातावरण तापलं आहे, ज्याला पार्श्वभूमी आहे ती डीजेची. डीजेमुळे नाहक त्रास होतो, अशा भूमिकेतून राज्यातील अनेक सामाजिक कार्यकर्ते त्यांची मत मांडत आहेत. यासगळ्याची सुरुवात पुण्यातून झाली. पुण्यातील विद्यानंद बापटांनी सार्वजनिक उत्सवांमध्ये डीजे आणि लाऊडस्पीकर नसावेत अशी भूमिका सर्वात आधी मांडली होती. त्यानंतर ते सोशल मीडियावर प्रचंड व्हायरल झाले. अनेक मुलाखतींमधून त्यांचं मत मांडलं. तर दुसरीकडे नागपुरात गणेशोत्सवाच्या काळात डीजेवर बंदी घालण्यात आली आहे.

संजय शिरसाट काय म्हणाले?

दरम्यान, आता शिवसेना शिंदे गटाचे नेते आणि सामाजिक न्यायमंत्री संजय शिरसाट यांनी डीजेबंदीचं जाहीर समर्थन केलं आहे. त्यांनी टीव्ही9 मराठीशी संवाद साधला. यावेळी संजय शिरसाट म्हणाले की,”डीजे बंदीमुळे काही लोकांना वाईट वाटत असेल तर वाटू द्या. कारण लहान बालकं, वयोवृद्ध लोक असतील तसेच आजारी लोक असतील त्यांना याचा प्रचंड त्रास होतो. लहान मूलं मिरवणुकीत येत नाहीत. ते मिरवणुका पाहुही शकत नाहीत. ज्या ज्या ठिकाणावरुन मिरवणूक जाते. तेथील लोकांना त्याचा त्रास असतो, हे आपण नाकारु शकत नाही, ” असं शिंदेंचे मंत्री संजय शिरसाट म्हणाले आहेत.

नागरिकांचे आरोग्य आणि सुरक्षितता महत्त्वाची असल्याने गणेशोत्सव पारंपरिक पद्धतीने साजरा करण्याचे आवाहन त्यांनी गणेश मंडळांना केले. छत्रपती संभाजीनगरसारख्या संवेदनशील शहरात यंदाही डीजे वाजणार नाही, असे शिरसाट यांनी स्पष्ट केले. पारंपरिक वाद्यांच्या साथीनेही उत्साहात गणेशोत्सव साजरा करता येतो, असे त्यांनी सांगितले.

राज ठाकरेंची डीजेच्या वादात उडी

दरम्यान, काही वेळापूर्वीच महाराष्ट्र नवनिर्माण सेनेचे अध्यक्ष राज ठाकरे यांनीही डीजेबंदीवर त्यांचं भूमिका मांडली. त्यांनी यावेळी सांगितलं की, नागपुरमध्ये डीजेवर बंदी येऊ शकते पण पुण्यात बंदी येऊ शकत नाही. एकाच राज्यात दोन वेगवेगळे नियम का? असा सवाल यावेळी राज ठाकरे यांनी केला. ते आज ठाण्यात आयोजित पक्षाच्या पदाधिकाऱ्यांच्या मेळाव्यात बोलत होते.

डीजेच्या वादावरुन राज ठाकरेंनी मुख्यमंत्री देवंद्र फडणवीसांवर निशाणा साधला आहे. त्यांनी म्हटलं की, पुण्यातील डीजेच्या वादावर मुख्यमंत्री नेमकं काय बोलले आहेत मला आजपर्यंत काही कळलेलं नाही. ते म्हणतात की मला कायद्याने मला आम्हाला काही करता येत नाही. तर मग नागपुरामध्ये डीजे कसा बंद झाला? नागपूरसाठी वेगळा नियम आणि पुण्यासाठी वेगळा नियम, अशी रोखठोक भूमिका राज ठाकरे यांनी यावेळी मांडली.