शेजाऱ्याशी शारीरिक संबंध ठेव, नशीब उजळेल… दैवी शक्ती असल्याचं भासवून रचलं कारस्थान, माजी भाजप कार्यकर्त्याचा प्रताप

महाराष्ट्रातील चंद्रपूर जिल्ह्यातून एक धक्कादायक बातमी समोर येत आहे. चिमूर तालुक्यातील नेरी गावात राहण्याऱ्या एका महिलेने आरोप केले आहेत की, तिच्या शेजारी राहणाऱ्या 60 वर्षांच्या व्यक्तीने फोनवर महिलेचा आवज काढत, स्वतःला सरकारी अधिकारी सांगत दैवी शक्ती असल्याचं भासवून त्याच्यासोबत शारीरिक संबंध ठेवण्यास सांगितलं… एवढंच नाही तर, शेजारी राहणाऱ्या व्यक्तीसोबत शारीरिक संबंध ठेवल्यास नशीब चमकेल… असं देखील फोनवरून महिलेला सांगण्यात आलं. पीडित महिलेच्या तक्रारीची दखल घेत, पोलिसांनी अधिक चौकशी सुरु केली. पण कथित आरोपी सध्या फरार असल्याची माहिती समोर येत आहे.

समोर येत असलेल्या माहितीनुसार, कथित आरोपीने ऍपच्या मदतीने किंवा कोणत्या टेक्नोलॉजीच्या मदतीने महिलेच्या आवाजात पीडितेसोबत संबंध साधला. सर्वात आधी त्याने पीडितेचा विश्वास संपादन केला आणि तिला समजवण्याचा प्रयत्न केला की, शेजाऱ्यासोबत शारीरिक संबंध ठेव. ज्यामुळे तुझं आणि तुझ्या मुलाचं भविष्य उज्वल होईल… पण हे मोठं कारस्थान आहे… हे महिलेला कळलं होतं… त्यानंतर महिलेने थेट पोलीस स्थानकात तक्रार दाखल केली.

सांगायचं झालं तर, ही पहिली वेळ नाही, जेव्हा आरोपीने महिलांना लक्ष्य केलं आहे. यापूर्वी देखील 60 वर्षीय दत्तू पिसे याच्यावर नात्यातल्या महिलेने गंभीर आरोप केलेले… पीडितेने पोलिसांनी सांगितल्यानुसार, याआधी देखील दत्तू पिसे याने महिलेच्या जवळ येण्याचा प्रयत्न केला. पण त्याला यश मिळालं नाही. दत्तू पिसे याच्याबद्दल सांगायचं झालं तर, आरोपी दत्तू पिसे हा यापूर्वी भाजपचे तालुका उपाध्यक्ष म्हणून कार्यरता होता. भाजपच्या वरिष्ठ नेत्यांच्या मते, निवडणुकांदरम्यान पक्षाच्या विरोधात काम केल्यामुळे त्याला पक्षातून काढून टाकण्यात आलं होतं. सध्या तो चिमूर कृषी उत्पन्न बाजार समितीचा संचालक आहे.

पीडित महिलेच्या म्हणण्यानुसार, मे 2026 मध्ये तिच्या नवऱ्याच्या मोबाईलवर दोन वेगळ्या नंबरवरुन फोन आले… कॉल करणाऱ्या महिलेने स्वतःची ओळख पुणे येथील सहकार आयुक्त कार्यालयातील अधिकारी ‘विद्या गोखले’ अशी करून दिली. दरम्यान, तिने त्या महिलेच्या नोकरी आणि जन्मतारखेबाबतची माहिती सांगितली. त्यानंतर तिने ज्योतिषशास्त्र, वास्तुशास्त्र आणि कुंडली यांसारख्या विषयांवर चर्चा केली. फोन करणाऱ्या महिलेने पीडितेच्या आयुष्यातील काही घटनांबद्दल जी माहिती दिली ती अचूक ठरल्याचं त्या महिलेने सांगितले; यामुळे तिचा विश्वास वाढला.

त्या महिलेच्या म्हणण्यानुसार, फोनवर बोलत असताना समोरच्या महिलेने असा दावा केला की, तिच्या घरासमोर राहणाऱ्या एका पुरुषाकडे दैवी शक्ती आहेत आणि पीडितेने त्याच्याशी संपर्क ठेवावा. त्यानंतर कथित महिलेने पीडितेला तिच्या वैवाहिक जीवनाबद्दल आणि खाजगी संबंधांबद्दल अत्यंत वैयक्तिक प्रश्न विचारले.

पीडित महिलेने सांगितल्यानुसार, तिचे पती कॅन्सर पीडित होते आणि त्यानंतर त्यांचं निधन झालं. पतीच्या फोनची रेकॉर्डिंग कायम सुरु असायची. त्यामुळे फोनवर काय बोलणं झालं आणि काय नाही हे सर्व रेकॉर्ड झालेलं… ती रेकॉर्डिंग ऐकल्यानंतर पीडितेला संशय आला. ‘विद्या’ म्हणून बोलणारी व्यक्ती ही स्त्री नसून खुद्द दत्तू पिसेच आहे आणि तोच स्त्रीचा आवाज काढत आहे, याची तिला खात्री पटली. सध्या पोलीस या प्रकरणाची कसून चौकशी करत आहेत.