एकनाथ शिंदेंचा कार्यक्रम रद्द करा नाहीतर परभणीत मोठा गोंधळ? वाहनही तयार, मनोज जरांगे पाटलांचा मोठा इशारा

मराठवाड्यातील उपमुख्यमंत्री एकनाथ शिंदे यांच्या कार्यक्रमाला मराठा आंदोलक मनोज जरांगे पाटील यांनी कडाडून विरोध केला आहे. आज परभणीत दुपारून शिंदे यांचा शेतकरी संवाद मेळावा होत आहे. खासदार संजय जाधव यांनी हा कार्यक्रम आयोजित केला आहे. मंत्री संजय शिरसाट यांच्या सांगण्यावरून हा कार्यक्रम आयोजित करण्यात आल्याचा आरोप करत जरांगे यांनी हा कार्यक्रम लागलीच रद्द करण्याची मागणी केली आहे. अन्यथा परभणीत मोठा गोंधळ होण्याचा इशाराच त्यांनी दिला. यामुळे एकच खळबळ उडाली आहे.

नाहीतर मोठा गोंधळ

“बंडू जाधव मी तुम्हाला अजूनही व्यवस्थित भाषेत बोलत आहे. तुम्हाला वाटतं असेल की तुम्ही मोठे दादा वगैरे आहात. मंत्री शिरसाट यांचं ऐकून बंडू जाधव यांनी कार्यक्रम घेतला आहे. काय गरज आहे. त्यांना कार्यक्रम घ्यायची? मराठ्यांनी तुमच्यासाठी खस्ता खायच्या आणि तुम्ही कार्यक्रम आयोजित करायचा. मी कधीच कुणावर असं बोलेलो नाही. कार्यक्रम रद्द करा. अन्यथा मी परभणीत येईल. बंडू जाधव यांना राज्य अस्थिर करायचं आहे का? शिंदे यांना नांदेडपर्यंत जायचे आहे. विमानतळं तिथं आहे. शिरसाट यांच्या सांगण्यावरून तुम्ही हे कृत्य करता का? कशाला तुम्हाला आमच्या मतदारसंघात यायचं आहे? बंडू जाधव संपून जाईल. काय दिलं यांनी शेतकऱ्यांना? वाटोळं केलं यांनी शेतकऱ्यांचं. गोरगरिब मराठ्यांनी तुम्हाला निवडून आणलं. तुम्ही कुठंही गेलात त्याबद्दल आम्ही काहीही बोललो नाही. शिरसाट यांच्या सांगण्यावरून मराठा समाजाचे जात प्रमाणपत्र रद्द केले. मग आता हा दौरा कशासाठी? मी उपोषण सोडून कार्यक्रमस्थळी जाईल.” असा इशारा मनोज जरांगे पाटील यांनी दिला आहे. यामुळेच एकच खळबळ उडाली आहे.

परभणीला जाण्यासाठी वाहन तयार

परभणीला जाण्यासाठी वाहन तयार आहे. मी बंडू जाधव यांना अजूनही व्यवस्थित भाषेत सांगत आहे. त्यांना दहा मिनिटात फोन करण्यासाठी सांगितले आहे. त्यांच्या उत्तराची वाट पाहणार आहे. त्यांना हा कार्यक्रम रद्द करण्यासाठी सांगितले आहे. नाहीतर मी उपोषण सोडून कार्यक्रमस्थळी जाईल अशी प्रतिक्रिया मनोज जरांगे पाटील यांनी दिली आहे. आता या कार्यक्रमाविषयी काय निर्णय होतो याकडे सर्वांचे लक्ष लागले आहे.

परभणी येथे आज दुपारी एकनाथ शिंदे यांचा शेतकरी संवाद मेळावा

परभणी येथे आज दुपारी एकनाथ शिंदे यांचा शेतकरी संवाद मेळावा आहे. दुपारी एक वाजता एकनाथ यांच्या उपस्थितीत सभेला सुरुवात होणार आहे. बॉम्ब स्कॉड पथकाकडून सभा स्थळाची पाहणी करण्यात आली आहे. उपमुख्यमंत्री एकनाथ शिंदे यांच्या स्वागतासाठी गुलाबांचा दीड क्विंटलचा हार स्टेज वर आहेत. पण आता मनोज जरांगे पाटील यांच्या भूमिकेमुळे या कार्यक्रमावरच प्रश्नचिन्ह उपस्थित झालं आहे.