Parth Pawar : वाजवा रे वाजवा, पार्थ पवारांचं लग्न ठरलं, दादांच्या घरी पुन्हा एकदा शुभमंगल सावधान

राष्ट्रवादी काँग्रेसच्या अध्यक्ष आणि उपमुख्यमंत्री सुनेत्रा पवार यांच्या घरात पुन्हा सनई चौघडे वाजणार आहेत. सुनेत्रा पवार यांचे ज्येष्ठ सुपूत्र पार्थ पवार यांचं लग्न ठरलं आहे.  त्याआधी त्यांचा साखरपुडा होणार असल्याची बातमी आहे. कायनात धार यांच्याशी पार्थ पवार यांचा साखरपुडा होणार आहे. कायनात धार आणि पार्थ पवार हे दोघेही सुप्रिया सुळे यांची मुलगी रेवतीच्या लग्नात एकत्र दिसले होते. कायनात धार या सध्या दिल्लीमध्ये कार्यरत आहेत.पार्थ पवार आणि कायनात धार यांचा साखरपुडा 29 जुलैला पुण्यात होणार असल्याची माहिती आहे. मुंबईत फाईव्ह स्टार हॉटेलमध्ये सुप्रिया सुळे यांची मुलगी रेवतीचं लग्न झालं. त्यावेळी पार्थ पवारांसह कायनात धार दिसल्या होत्या. तेव्हापासूनच दोघांच्या नात्याबद्दल आणि कायनात धार कोण अशी चर्चा सुरु झालेली. अखेर आज त्याचं उत्तर मिळालं आहे. कायनात धार या पार्थ पवारांच्या भावी पत्नी आहेत.

कायनात धार फक्त सुखाच्या क्षणातच नाही, तर दु:खद प्रसंगातही पार्थ पवार यांच्यासोबत उभ्या होत्या. अजितदादांच्या निधनानंतर त्यांनी बारामतीत येऊन पवार कुटुंबाच सांत्वन केलं होतं. त्याशिवाय वरळी येथे आयोजित शोकसभेला सुद्धा उपस्थित होत्या. कायनात धार यांचे पवार कुटुंबाशी जिव्हाळ्याचे संबंध आहेत. मध्यंतरी कायनात धार आणि पार्थ पवार उज्जैनच्या प्रसिद्ध महाकाल मंदिरात एकत्र पूजा करताना दिसले होते.

जय पवार सुद्धा राजकारणात सक्रीय

अजित पवार यांचं विमान अपघातात निधन झाल्यानंतर पार्थ पवार राजकारणात मोठ्या प्रमाणात सक्रीय झाले आहेत. मध्यंतरी पार्थ पवारांवर जमीन घोटाळ्यांचे आरोप झाले होते. सध्या दिल्लीत ते राष्ट्रवादी काँग्रेसकडून खासदारकीची जबाबदारी संभाळत आहेत. अजित पवार यांचं जानेवारी महिन्याच्या 28 तारखेला विमान अपघातात निधन झालं. बारामती एअरपोर्टजवळ त्यांचं विमान कोसळलं. त्यानंतर सुनेत्रा पवार यांच्या हातात राष्ट्रवादी काँग्रेसची कमान आली. अजित पवार यांना दोन मुलं आहेत. त्यांचा धाकटा सुपूत्र जय पवार याचं अजितदादांच्या हयातीत परदेशात लग्न झालं होतं. जय पवार सुद्धा राजकारणात सक्रीय आहे.