हसत खेळत पिकनिकसाठी निघाले, पण वाटेत घडलं असं काही… दमाहे कुटुंबावर काळाचा घाला

महाराष्ट्रात सध्या रस्ते अपघातांच्या घटनांमध्ये सातत्याने वाढ होत आहे. त्यातच राज्यात दोन भीषण रस्ते अपघात घडल्याची धक्कादायक घटना समोर आली आहे. यातील पहिल्या घटनेत मध्य प्रदेशातील कान्हा केसली येथे पर्यटनासाठी जाणाऱ्या गोंदियातील दमाहे कुटुंबावर काळाने झडप घातली. यात एका महिलेचा जागीच मृत्यू झाला. तर दुसऱ्या घटनेत वाशिम जिल्ह्यात समृद्धी महामार्गावर ट्रॅव्हल्सने ट्रकला मागून धडक दिल्याने चालक-क्लीनरसह १५ प्रवासी गंभीर जखमी झाले आहेत.

दमाहे कुटुंबावर घाला

पर्यटनासाठी निघालेल्या गोंदिया जिल्ह्यातील आमगाव येथील दमाहे कुटुंबावर काळाने अचानक घाला घातला आहे. मध्य प्रदेशातील प्रसिद्ध कान्हा केसली राष्ट्रीय उद्यानाकडे जात असताना बालाघाट-बैहर मार्गावरील लोंगूर घाटीत कार आणि प्रवासी बसचा भीषण अपघात झाला. विरुद्ध दिशेने येणाऱ्या बसने कारला दिलेल्या जोरदार धडकेत एका महिलेचा जागीच मृत्यू झाला. यात तिचे पती आणि दोन मुले गंभीर जखमी झाली आहेत.

दुर्गा निमेश दमाहे (३३) असे मृत महिलेचे नाव आहे. आमगाव शहरातील पेंट व्यावसायिक निमेश दमाहे हे आपली पत्नी दुर्गा, मुलगा यश आणि मुलगी रुची यांच्यासह कारने कान्हा केसली येथे पर्यटनासाठी निघाले होते. दरम्यान, लौगर घाटात समोरून येणाऱ्या वेगवान बसने त्यांच्या कारला समोरासमोर जोरदार धडक दिली. या धडकेत दुर्गा दमाहे यांचा जागीच दुर्दैवी मृत्यू झाला. तर निमेश, यश आणि रुची गंभीर जखमी झाले. या जखमींना तातडीने बालाघाट येथील जिल्हा रुग्णालयात दाखल करण्यात आले आहे.

समृद्धी महामार्गावर ट्रॅव्हल्सची ट्रकला मागून धडक; १५ प्रवासी जखमी

तर दुसरी दुर्घटना वाशिम जिल्ह्यात समृद्धी महामार्गावर घडली आहे. महामार्गावरील मुंबई लेनवर, मालेगाव तालुक्यातील चॅनल क्रमांक २२३ जवळ एका चालत्या ट्रकला ट्रॅव्हल्स बसने मागून जोरदार धडक दिली. या भीषण अपघातात ट्रॅव्हल्सचा चालक आणि क्लीनर यांच्यासह १५ प्रवाशांना गंभीर दुखापत झाली आहे.

मिळालेल्या माहितीनुसार, महामार्गावरून जात असताना समोरील ट्रक चालकाने अचानक ब्रेक मारल्याने मागून येणाऱ्या ट्रॅव्हल्सची ट्रकला जोरदार धडक बसली. अपघाताची माहिती मिळताच मदत पथकाने घटनास्थळी धाव घेत जखमींना तातडीने वाहनातून बाहेर काढले. सर्व जखमी प्रवाशांना पुढील उपचारासाठी वाशिम आणि अकोला येथील रुग्णालयात दाखल करण्यात आले आहे. या अपघातामुळे महामार्गावरील वाहतूक काही काळ विस्कळीत झाली होती.