लॉलीपॉप ते चोर… शिवसेना भाजपात बँनरवॉर रंगलं, महायुतीमधील वाद पुन्हा चव्हाट्यावर

भंडारा जिल्ह्यात महायुतीतील घटक पक्ष असलेल्या शिवसेना (शिंदे गट) आणि भाजपमधील राजकीय संघर्ष आता थेट सोशल मीडियावर पाहायला मिळत आहे. दोन्ही पक्षांच्या कार्यकर्त्यांकडून एकमेकांवर पोस्टर, मीम्स आणि खोचक शेरेबाजी करत आरोप-प्रत्यारोप सुरू असून, या ‘सोशल मीडिया वॉर’मुळे जिल्ह्यातील राजकीय वातावरण चांगलेच तापले आहे.

भंडाऱ्यात पोस्टरबाजी

भाजप आमदार नरेंद्र भोंडेकर यांच्या समर्थनार्थ तयार करण्यात आलेल्या एका पोस्टरमधून विरोधकांना थेट इशारा देण्यात आला आहे. शिवसेनेच्या बसलेल्या वाघासमोर उभा पार्सलही बुटकाच दिसेल… वाघ आमचा जागा आहे, खेळणं कोणाच्या बापाचं नाही! असा आक्रमक मजकूर या पोस्टरवर आहे. या पोस्टरमुळे शिवसेना समर्थक आणि भाजप कार्यकर्त्यांमधील राजकीय संघर्ष अधिक तीव्र झाल्याचे दिसून येत आहे.

दुसरीकडे, विकासकामे आणि दिलेल्या आश्वासनांवरून आमदारांना लक्ष्य करणारे पोस्टर आणि फोटोही सोशल मीडियावर व्हायरल होत आहेत. आधी लोकांना दिला लॉलीपॉप, म्हणून आज मी पण घेतला लॉलीपॉप अशा उपरोधिक मजकुराचा वापर करत विरोधकांकडून टीका करण्यात येत आहे. त्यामुळे दोन्ही बाजूंनी सोशल मीडिया हेच आरोप-प्रत्यारोपांचे व्यासपीठ बनले आहे.

शिवसेनेकडून पलटवार

दरम्यान, शिवसेना जिल्हाप्रमुख अनिल गायधने यांनी सोशल मीडियावर सुरू असलेला हा वाद थांबवण्याचे आवाहन केले आहे. दोन्ही पक्षांनी आपापसातील मतभेद बाजूला ठेवून भंडारा शहराच्या विकासावर लक्ष केंद्रित करावे, अशी भूमिका त्यांनी मांडली. मात्र, याचवेळी त्यांनी विरोधकांना सणसणीत शब्दांत इशाराही दिला.

‘आमच्याकडून गेलेला चोर जो आता तुमच्याकडे आला आहे, त्याला तुम्हीच सांभाळा. तो भविष्यात तुमचे काय नुकसान करेल, हे तुम्हाला नंतर समजेल,’ असा टोला गायधने यांनी लगावला. तसेच, ‘त्याला आवरा, अन्यथा यापुढे कोणीही शिवसेनेविरोधात बोलल्यास शिवसेना त्याला जशास तसे चोख उत्तर देईल,’ असा थेट इशाराही त्यांनी दिला. महायुतीतील दोन्ही घटक पक्षांमध्ये सुरू असलेल्या या शाब्दिक आणि सोशल मीडिया संघर्षामुळे आगामी काळात भंडारा जिल्ह्यातील राजकीय समीकरणांवर त्याचा काय परिणाम होणार, याकडे आता राजकीय वर्तुळाचे लक्ष लागले आहे.