Pune MHADA Lottery : पुण्यात घर घेण्याचं स्वप्न होणार पूर्ण, म्हाडाकडून 4400 घरांसाठी सोडत जाहीर; अर्ज कसा, कुठे करावा?

Pune Pimpri Chinchwad MHADA Lottery : पुणे या शहराचा विकास झपाट्याने होत आहे. हे शहर विस्तारण्याचा वेगही प्रचंड आहे. पुणे हे विद्येचं माहेरघर म्हणून ओळखलं जातं. आता याच पुण्यात अनेक आयटी कंपन्या, औद्योगिक वसाहती आहेत. म्हणूनच पुण्यात घर घेण्यासाठी अनेकजण धडपडत आहेत. परंतु सध्या पुण्यासारख्या शहरात घरांची किंमत प्रचंड वाढली आहे. असे असतानाच आता म्हाडाने जाहीर केलेल्या लॉटरीच्या रुपात तुमचे हक्काचे घर घेण्याचे स्वप्न पूर्ण होऊ शकते. म्हाडाने तब्बल ४,४६२ घरांसाठी सोडत जाहीर केली आहे.

मिळालेल्या माहितीनुसार पुणे आणि पिंपरी चिंचवड महानगरपालिका क्षेत्रातील विविध गृहनिर्माण योजनांअंतर्गत ४,४६२ घरांच्या विक्रीसाठी म्हाडाची संगणकीय सोडत जाहीर झाली आहे. सोडतीमध्ये १५ टक्के सामाजिक गृहनिर्माण योजनेअंतर्गत अत्यल्प व अल्प उत्पन्न गटासाठी पुणे येथील मांजरी खुर्द , म्हाळुंगे, भूगाव येथील सदनिका विक्रीसाठी उपलब्ध आहेत.

या सोडतीत २० टक्के सर्वसमावेशक गृहनिर्माण योजनेअंतर्गत पुणे महानगरपालिका हद्दीतील धानोरी, वारजे, कात्रज, हडपसर, पाषाण, खराडी, बाणेर, धायरी, लोहगाव, बिबडेवाडी, मुंढवा, ऊंड्री, वडगाव, बावधन, कोंढवा खुर्द येथे सदनिकांचा समावेश आहे २० टक्के सर्वसमावेशक गृहनिर्माण योजनेअंतर्गत पिंपरी चिंचवड महानगरपालिका हद्दीतील मोशी, किवळे, डुडूळगाव, ताथवडे, वाकड, चिखली, रावेत, पुनावळे, वाकड, बालेवाडी, रहाटणी, वडमुखवाडी, मानुर्डी, पिंपळे सौदागर, पिंपळे गुरवच्या सदनिका आहेत.

अर्जांची नोंदणी कधीपासून सुरू होणार?

ऑनलाइन अर्ज नोंदणी २४ ऑगस्ट २०२६ पासून सुरू झाली असून, १५ सप्टेंबर २०२६ रोजी रात्री ११:५९ वाजेपर्यंत अर्ज सादर करता येतील. घरांच्या किमती १३ लाखांपासून सुरू होणार असून; EWS साठी वार्षिक उत्पन्न मर्यादा ६ लाख, तर LIG साठी ९ लाख रुपये निश्चित केली आहे. स्वीकृत अर्जांची प्रारूप यादी २९ सप्टेंबरला, तर अंतिम यादी ८ ऑक्टोबरला प्रसिद्ध केली जाईल. संगणकीय पद्धतीने ही लॉटरी १३ ऑक्टोबर २०२६ रोजी सकाळी ११:०० वाजता काढण्यात येणार आहे. नोंदणी व अधिक माहितीसाठी अर्जदारांनी म्हाडाच्या housing.mhada.gov.in या अधिकृत पोर्टलला भेट द्यावी, असे आवाहन करण्यात आले आहे.