सोमेश्वर कारखान्याच्या २१ जागांसाठी उद्या मतदान; त्याआधी पैशांवरून वाद, निवडणूक निर्णय अधिकाऱ्यांनी सांगितलं काय घडलं?

सोमेश्वर सहकारी साखर कारखान्याच्या निवडणुकीच्या पार्श्वभूमीवर पैसे वाटपाच्या आरोपामुळे राजकीय वातावरण तापले आहे. माळेगाव नगरपंचायतीच्या नगराध्यक्षांवर पैसे वाटप केल्याचा आरोप पुरुषोत्तम जगताप यांच्या कार्यकर्त्यांनी केला. या घटनेचा व्हिडिओ सोशल मीडियावर व्हायरल झाला होता. या प्रकरणात २ लाख २ हजार ३०० रुपयांची रक्कम हस्तगत करण्यात आली आहे. परस्पर तक्रारींच्या आधारे पोलीस तपास सुरू असल्याची माहिती निवडणूक निर्णय अधिकारी दिग्विजय आहेर यांनी दिली.

या घटनेबाबत माहिती देताना आहेर म्हणाले की, सुरुवातीला दोन गटांमध्ये वाद झाला. त्यातील एका गटाने संबंधित रोख रक्कम घेऊन तक्रार केली. तक्रार प्राप्त झाल्यानंतर पोलीस आणि आचारसंहिता पथकाचे कर्मचारी घटनास्थळी पोहोचले. मात्र काल रात्री घडलेल्या प्रकारात पथकाला सुरुवातीला पैसे हस्तगत करता आले नव्हते. त्यानंतर या प्रकरणात २ लाख २ हजार ३०० रुपयांची रक्कम हस्तगत करण्यात आली.

या प्रकरणात दोन्ही बाजूंनी तक्रारी आणि आरोप करण्यात आले आहेत. पोलीस त्याचा तपास करत आहेत, असे आहेर यांनी स्पष्ट केले. तर दुसरीकडे सोमेश्वर सहकारी साखर कारखान्याच्या निवडणुकीसाठी उद्या मतदान होणार आहे. कारखान्याच्या कार्यक्षेत्रात पुणे आणि सातारा जिल्ह्यांचा समावेश आहे. एकूण २७ हजार ७०० मतदार असून, २१ जागांसाठी ८३ उमेदवार निवडणुकीच्या रिंगणात आहेत. मतदानासाठी ९३ केंद्रांची व्यवस्था करण्यात आली आहे. सुमारे ७५० कर्मचारी तैनात असतील.

सकाळी ८ ते सायंकाळी ५ या वेळेत मतदान प्रक्रिया पार पडणार आहे. मतदानासाठी आवश्यक पोलीस बंदोबस्त उपलब्ध झाल्याचेही आहेर यांनी सांगितले. १२ ऑक्टोबर रोजी सकाळी ९ वाजल्यापासून मतमोजणीला सुरुवात होणार आहे. मतमोजणी लवकर पूर्ण व्हावी यासाठी ९३ टेबलची व्यवस्था करण्यात आली आहे. त्यामुळे संध्याकाळपर्यंत निकाल हाती येतील, अशी व्यवस्था केल्याची माहिती निवडणूक निर्णय अधिकारी दिग्विजय आहेर यांनी दिली. आता मतदानाच्या दिवशी प्रशासनासमोर शांततेत आणि पारदर्शक पद्धतीने निवडणूक प्रक्रिया पार पाडण्याचे आव्हान असणार आहे.