भाजपच्या बड्या नेत्याला हृदयविकाराचा झटका, लीलावती रुग्णालयात दाखल

मुंबई | 26 सप्टेंबर 2023 : मुंबईतून मोठी बातमी समोर आली आहे. माजी केंद्रीय मंत्री आणि भाजप नेते शाहनवाज हुसैन यांची प्रकृती बिघडल्याने त्यांना मुंबईतल्या लीलावती रुग्णालयात दाखल करण्यात आलं आहे. मिळालेल्या माहितीनुसार, शाहनवाज हुसैन यांना हृदयविकाराचा झटका आल्याने लीलावती रुग्णालयात दाखल करण्यात आलं आहे. शाहनवाज हुसैन यांना आज दुपारी चारच्या सुमारास लीलावती रुग्णालयात दाखल करण्यात आलं आहे. सध्या त्याच्यावर डॉक्टरांच्या देखरेखीखाली उपचार सुरू आहेत.

लीलावती रुग्णालयाच्या डॉक्टरांकडून महत्त्वाची माहिती

लीलावती रुग्णालयाचे डॉक्टर जलील पारकर यांनी शाहनवाज हुसैन यांच्या प्रकृतीविषयी माहिती दिली आहे. शाहनवाज हुसैन यांना हृदयविकाराचा झटका आला आहे. त्यांना उपचारासाठी लीलावती रुग्णालयात दाखल करण्यात आलं. डॉक्टरांनी त्यांची एंजिओप्लास्टी केलीय, अशी माहिती डॉक्टर जलील पारकर यांनी दिलीय.

शाहनवाज हुसैन हे पक्षाचे राष्ट्रीय प्रवक्ता आहेत. ते बिहार सरकारमध्ये उद्योग मंत्री देखील होते. ते तीनवेळा लोकसभेचे खासदार आणि एकदा बिहार विधान परिषदेचे सदस्य राहिले आहेत. शाहनवाज हुसैन हे अटलबिहारी वाजपेयी यांच्या सरकारमध्ये नागरी विमान वाहतूक मंत्री आणि वस्त्रोद्योग मंत्री देखील होते.

शाहनवाज हुसैन यांना हृदय विकाराचा झटका आल्याची बातमी वाऱ्यासारखी देशात पसरली आहे. विशेष म्हणजे मुंबईत, बिहार, बिहार भाजप आणि महाराष्ट्र भाजपमध्ये या घटनेच्या वृत्तामुळे खळबळ उडाली आहे. सर्व नेते आणि कार्यकर्त्यांकडून हुसैन यांची प्रकृती लवकर बरी व्हावी यासाठी प्रार्थना केली जात आहे.