Election Commission: मुंबईसह 51 जागांवरील मतमोजणीत मोठी गडबड? निवडणूक आयोगाचे काय उत्तर?

EVM Vote Counting 2024: विरोधक सातत्याने निवडणूक प्रक्रियेत गडबडीचा आरोप करत आहेत. 2024 मधील लोकसभा आणि विधानसभा निवडणुकीनंतर INDIA आघाडीकडून वारंवार हल्लाबोल करण्यात येत आहे. ईव्हीएमपासून ते आता मतदार याद्या आणि SIR प्रक्रियेविरोधात विरोधकांनी रान पेटवले आहे. मुंबईसह या 51 जागांवरील मतमोजणीत गडबड झाल्याचा आरोप करण्यात आला. त्यावर आता केंद्रीय निवडणूक आयोगाने उत्तर दिले आहे.

विरोधकांनी केंद्रीय निवडणूक आयोगाकडे एक अहवाल सादर केला आहे. त्यात महाराष्ट्र, हरियाणा आणि जम्मू काश्मीर या राज्यातील 51 जागांवर झालेले मतदान आणि मतमोजणीत विसंगत, फरक असल्याचा दावा करण्यात आला होता. हा दावा निवडणूक आयोगाने फेटाळला आहे. या मतदान केंद्रावर मतदानकर्त्यांना रोखण्यात आले अथवा बोगस मतदान झाले हा दावा आयोगाने फेटाळला. निवडणूक आयोगाने याविषयीचे सर्व दावे फेटाळले आहेत.

7.78 लाख मतं EVM वर मोजलीच गेली नाहीत

मुंबई उत्तर मतदारसंघात भाजपचे पीयूष गोयल यांनी काँग्रेसचे भूषण पाटील यांचा पराभव केला. या ठिकाणी मतदानात तफावत असल्याचा दावा करण्यात आला होता. नोंदीनुसार, इथं 18.11 लाखं मतं पडली होती. तर जाहीर झालेल्या निकालात मात्र 10.33 लाख मतं पडल्याचे समोर आले. म्हणजेच 7.78 लाख मतं ईव्हीएमने मोजलीच गेली नाहीत, असा दावा करण्यात आला होता.

हरियाणातील कैथल येथे काँग्रेसचे आदित्य सुरजेवाला यांनी भाजपचे लीला राम यांचा 8,124 मतांनी पराभव केला. अंतर्गत नोंदणीनुसार, या संपूर्ण मतदारसंघात केवळ 215 लोकांनीच मतदान केले. पण ईव्हीएमवर 1,67,285 मतं मोजली गेली असा वाद होता. श्रीनगर येथील लोकसभा मतदारसंघातही असाच वाद होता. नॅशनल कॉन्फरन्सचे आगा सय्यद रूहुल्लाह मेहदी विजयी झाले होते. एकूण 6,72,942 मतांची मोजणी झाली होती. तर ईव्हीएम मशीनवर 6,66,046 मतं मोजली गेली. याठिकाणी 6,896 मतांची तफावत दिसली. महाराष्ट्रासह हरियाणातील इतर चार मतदारसंघातही मतदारांनी केलेल्या मतदानाची आकडेवारी आणि मतमोजणीत मोठी तफावत दिसून आल्याचा दावा करण्यात आला होता. या 51 मतदारसंघापेकी इतकी मोठी त्रुटी समोर येऊनही निवडणूक आयोगाने पुनर्मतदान प्रक्रिया राबवली नसल्याचा दावा करण्यात आला होता.

#FACTCHECK The actual figures of votes polled on poll day are shared with polling agents of candidates in Form 17 and these figures are tallied with figures on EVMs at the time of counting of votes . https://t.co/BN7N7fcHOV

— ChiefElectoralOffice (@CEO_Maharashtra) November 11, 2026

ECI ने काय दिले उत्तर?

केंद्रीय निवडणूक आयोगाने 2024 मधील महाराष्ट्र, हरियाणा आणि जम्मू-काश्मीर निवडणुकीविषयीचे केलेले आरोप फेटाळून लावले. आयोगाने 66 पानांचे उत्तर दिले. त्यात निवडणूक नोंदींचा तपशील सादर करण्यात आला. हरियाणात काँग्रेसने 20 मतदारसंघात पुनर्मतदानाची मागणी केली होती. त्याच्या प्रत्युत्तरादाखल आयोगाने 1600 पानी अहवाल सादर केला होता. त्यात इत्यंभूत माहिती देण्यात आल्याचे आयोगाचे म्हणणे आहे. या ठिकाणाचा निवडणुकीचा टप्पा पारदर्शक आणि अचूक होता असे उत्तर आयोगाने दिले आहे.

पण या ठिकाणी आयोगात जो एक बदल झाला, त्यावरून विरोधक पुन्हा आक्रमक झाले आहेत. मे 2024 मध्ये निवडणूक आयोगाने सर्वोच्च न्यायालयात एक म्हणणे सादर केले होते. त्यानुसार निवडणूक प्रक्रियेतील नोंदी जर सार्वजनिक केल्यास गैरप्रकार होऊ शकतो. तर उच्च न्यायालयाने हरियाणा आयोगाला नोंदी आणि फुटेज उपलब्ध करून देण्याचे आदेश दिले होते. त्याचवेळी केंद्र सरकारने तातडीने 20 डिसेंबर रोजी निवडणूक संचालन नियमावलीत सुधारणा केली आणि या नोंदी आणि फुटेज सार्वजनिक करण्यास मनाई केली.