मध्य रेल्वेच्या डाऊन मार्गावरील वाहतूक ठप्प; कामावर जाणाऱ्यांची तारांबळ

मध्य रेल्वेच्या शेलू आणि नेरळ स्थानकांदरम्यान डेक्कन एक्स्प्रेसमध्ये तांत्रिक बिघाड झाल्याची माहिती समोर येत आहे. उद्यान एक्स्प्रेससह कर्जत लोकलसुद्धा वांगणी रेल्वे स्थानकात खोळंबली आहे. यामुळे डाऊन मार्गावरील मध्य रेल्वेची वाहतूक ठप्प झाली आहे. कर्जत-खोपोलीकडे जाणाऱ्या लोकल बदलापूर रेल्वे स्थानकात रद्द करण्यात आली आहे. वांगली स्थानकावर रेल्वे खोळंबल्याने प्लॅटफॉर्मवर प्रवाशांची गर्दी झाली आहे. तर सीएसएमटी, ठाणे, कल्याण आणि कर्जत-खोपोली मार्गावरही प्रवाशांची मोठी गर्दी पहायला मिळत आहे. यामुळे कार्यालयांसाठी निघालेल्या नोकरदार वर्गाचाही खोळंब झाला आहे. ऑफिस गाठणाऱ्या अनेक कर्मचाऱ्यांना आज लेट मार्कचा त्रास सहन करावा लागणार आहे. आठवड्यातून अनेकदा कुठल्या ना कुठल्या कारणाने मध्य रेल्वेची वाहतून उशिराने सुरू असल्याचं पहायला मिळतं. त्यात आता डेक्कन एक्स्प्रेसमध्ये तांत्रिक बिघाड झाल्याचं कारण समोर आलं आहे.

चाकरमान्यांचे हाल

सकाळची वेळ ही गर्दीची असते. त्याचवेळी एक्स्प्रेसमध्ये तांत्रिक बिघाड झाल्याची घटना घडली आहे. मध्य रेल्वेची वाहतून सुरळीत होण्यासाठी आणखी किती वेळ लागेल याबाबतची माहिती अद्याप रेल्वे प्रशासनाकडून देण्यात आलेली नाही. तरी लवकरच हे काम पूर्ण होईल, असं प्रशासनाकडून सांगण्यात येतंय. वांगणी, बदलापूर, अंबरनाथ इथून रोज सकाळी चाकरमानी मोठ्या प्रमाणात मुंबईला ऑफिसला जाण्यासाठी निघतात. मात्र आज सकाळी डाऊन मार्गावरील वाहतुकीवर परिणाम झाल्याने चाकरमान्यांना ऑफिस गाठण्यास उशीर होत आहे.

कर्जत-खोपोलीच्या गाड्या बदलापूर रेल्वे स्थानकातून रवाना

मुंबईहून पुण्याला जाणारी डेक्कन एक्स्प्रेस ही सकाळी सात वाजताच्या सुमारास छत्रपती शिवाजी महाराज टर्मिनस इथून निघते. या वेळेनुसार ही एक्स्प्रेस आजही सीएसएमटी स्थानकातून निघाली. मात्र शेलू आणि नेरळ रेल्वे स्थानकादरम्यान या एक्स्प्रेसमध्ये तांत्रिक बिघाड झाला. त्यामुळे डाऊन मार्गावरील गाड्या खोळंबून रेल्वे वाहतून ठप्प झाली. उद्यान एक्सप्रेससह कर्जत लोकल वांगणी रेल्वे स्थानकात खोळंबल्या आहेत. तर डाऊन मार्गावरील कर्जत-खोपोलीच्या गाड्या बदलापूर रेल्वे स्थानकातूनच सीएसएमटी स्थानकाकडे पाठवण्यात येत आहेत. डेक्कन एक्सप्रेसमधील तांत्रिक बिघाड दुरुस्त झाल्यानंतरच ही एक्सप्रेस पुढे रवाना होईल आणि त्यानंतरच खोळंबलेल्या लोकल सोडण्यात येतील अशी माहिती रेल्वे प्रशासनाकडून देण्यात आली आहे.