Maharashtra unlock 5 stage : मुंबई नेमकी कोणत्या टप्प्यात?

पहिल्या टप्प्यात दहा जिल्हे आहेत. जिथे सोमवार 7 जूनपासून पूर्णत: शिथीलता असेल. असं असताना मुंबई (Mumbai phase 3) नेमकी कोणत्या टप्प्यात 2 की 3 हा संभ्रम निर्माण झाला आहे.

mumbai municiple corporation

Reporter Vinayak Davrung | Edited By: Sachin Patil | सचिन पाटील | Updated on: Jun 05, 2021 | 5:02 PM

मुंबई : राज्य सरकारने गोंधळानंतर अखेर अनलॉकची नवी नियमावली (Maharashtra unlock guideline) जाहीर केली आहे. महाराष्ट्रात पाच स्तरावर अनलॉक (5 stage unlock plan) केलं जाणार आहे. पहिल्या टप्प्यात दहा जिल्हे आहेत. जिथे सोमवार 7 जूनपासून पूर्णत: शिथीलता असेल. असं असताना मुंबई (Mumbai phase 3) नेमकी कोणत्या टप्प्यात 2 की 3 हा संभ्रम निर्माण झाला आहे. (Maharashtra unlock guideline Mumbai in which phase lockdown update rules)

राज्य सरकारने काढलेल्या आकडेवारीनुसार मुंबई महापालिकेचा दोन आठवड्यांचा सरासरी पॉझिटिव्हिटी रेट 5.30 टक्क्यांवर आहे. तर, सरासरी ऑक्सिजन बेड 32 ते 34% पर्यंत व्यापलेले आहेत. या आकडेवारीनुसार मुंबई महापालिका लेव्हल 3 मध्ये जाते.

येत्या सोमवारपासून सुरु होणाऱ्या अनलॉकच्या पहिल्या आठवड्यात लेव्हल 3 आणि त्यानंतर पॉझिटिव्हिटी रेट कमी झाला की लेव्हल 2 अशा रितीनं मुंबईत अनलॉक प्रक्रिया राबवली जाऊ शकते. याबाबत मुंबई महापालिका आज संध्याकाळपर्यंत स्वतंत्र परिपत्रक काढण्याचीही शक्यता आहे.

महानगरपालिकांची वर्गवारी 5 गटांमध्ये

राज्य सरकारने जारी केलेल्या अनलॉकच्या 5 टप्प्यांच्या नियोजनानुसार राज्यातील जिल्हे, महानगरपालिकांची वर्गवारी 5 गटांमध्ये केली जाणार आहे. यामध्ये स्थानिक कोरोना पॉझिटिव्हिटी रेट आणि एकूण ऑक्सिजन बेड्सची ऑक्युपन्सी या प्रमाणावरून एक ते पाच टप्प्यांमध्ये ही वर्गवारी करण्यात आली आहे. त्यानुसार तिथले नियम बदलणार आहेत. मात्र, या सगळ्यामध्ये मुंबई नेमकी कोणत्या गटात आहे? याविषयी संभ्रम निर्माण झाला आहे.

व्यापारी, दुकानदार, स्थानिक यांच्यामध्ये हा संभ्रम असून त्यावर मुंबईच्या महापौर किशोरी पेडणेकर यांनी स्पष्टीकरण दिलं आहे. सध्याच्या आकडेवारीनुसार मुंबई तिसऱ्या गटामध्ये असल्याची माहिती महापौरांनी दिली. मात्र, याविषयी सविस्तर चित्र संध्याकाळपर्यंत स्पष्ट होऊ शकेल, असं त्या म्हणाल्या.

मुंबईतील सध्याचा पॉझिटिव्ह रेट बघता राज्य सरकारच्या नियमावलीनुसार मुंबई तिसऱ्या टप्प्यात आहे. तर ऑक्सिजन बेडची क्षमता 32 ते 34 टक्के आहे. त्यामुळे मुंबईत दुसऱ्या टप्प्यात येऊ शकते. तसेच मुंबईत लोकल सेवाही महिलांसाठी मुभा दिली जाऊ शकते. पण मुंबईतील लोकल सेवा सुरु झाली तर ती लोकल कर्जतपर्यंत जाणार म्हणजे कर्जत हे रायगडमध्ये येते. पण रायगड हे चौथ्या टप्प्यात येतं आणि तेथे कडक लॉकडाऊन आहे. त्यामुळे पालिका ही मुभा देते का बघावं लागणार आहे.