Gokul President Election 2026 : नाविद मुश्रीफ यांची गोकुळमध्ये पुन्हा एन्ट्री? हसन मुश्रीफ यांचं मुलाबद्दल मोठं विधान काय?
गोकुळ निवडणुकीत नाविद मुश्रीफ यांचा पराभव झाला तरी, सरकारी संचालक नेमणुकीत त्यांच्या संभाव्य एन्ट्रीची चर्चा होती. मात्र, हसन मुश्रीफ यांनी या चर्चांना पूर्णविराम दिला आहे. नाविद गोकुळमध्ये संचालक होणार नाही, असे त्यांनी स्पष्ट केले. तसेच, सतेज पाटलांना बहुमत मिळूनही चेअरमन निवडता येत नसल्याने निर्माण झालेल्या कोंडीवरही त्यांनी भाष्य केले.
गोकूळच्या निवडणुकीत हसन मुश्रीफ यांचे चिरंजीव आणि गोकूळचे मावळते चेअरमन नाविद मुश्रीफ यांचा पराभव झाला आहे. मात्र, या निवडणुकीत सतेज पाटील यांना बहुमत मिळालं नाही. त्यामुळे सरकारने गोकुळवर चार संचालक नेमण्याचा निर्णय घेतला आहे. या चार संचालकांमध्ये नाविद मुश्रीफ यांचा समावेश असण्याची चर्चा होत आहे. चार पैकी एक संचालक म्हणून नाविद गोकूळवर येणार असल्याचं सांगितलं जात आहे. नाविद मुश्रीफ बॅकडोअरने गोकूळवर येण्याची चर्चा रंगली असून या सर्व चर्चांना हसन मुश्रीफ यांनी पूर्णविराम दिला आहे. गोकूळवर माझा मुलगा जाणार नाही, असं मुश्रीफ यांनी मीडियाशी संवाद साधताना स्पष्ट केलं आहे.
हसन मुश्रीफ यांनी यावेळी सतेज पाटील यांच्यावर टीका केली. सतेज पाटील यांचं बहुमत आहे ना? मग त्यांनी कोरम पूर्ण करावा आणि निवडावा त्यांचा चेअरमन. आम्ही कुठे त्यांना आडवलं आहे? पण त्यांना ते शक्यच होणार नाही. कारण गोकूळचा बायलॉज आणि नियमानुसार कोरम पूर्ण झाल्यावरच चेअरमन निवडला जातो. कोरम नसेल तर चेअरमनही निवडता येत नाही आणि मिटिंगही घेता येत नाही, असं हसन मुश्रीफ यांनी म्हटलं आहे.
मुलाची एन्ट्री नाही
गोकूळमधील डेडलॉक दूर करण्यासाठी सरकारने चार संचालक नेमण्याचा निर्णय घेतला आहे. सरकारने हा कायदा आणला असला तरी माझा मुलगा किंवा इतर पक्षाचं कोणीही गोकूळमध्ये संचालक होणार नाही. माझ्या मुलाचा बॅकडोअरने प्रवेश होणार नाही. तिथे तज्ज्ञांचीच नियुक्ती होईल. कोणत्याही पक्षाशी संबंध नसलेल्या कार्यकर्त्याची गोकूळवर सरकार नेमणूक करेल असं मला वाटतं, असं हसम मुश्रीफ यांनी सांगितलं.
प्रशासक नेमू शकलो असतो
हा डेडलॉक आहे. एका बायलॉजमुळे झालेला डेडलॉक आहे हे विरोधक समजून घेत नाही. त्यांनी त्यांचा चेअरमन निवडावा किंवा कोर्टात जावं, आम्ही त्यांना अडवलं नाही. न्यायालय काय निर्णय घेईल तो घेईल. त्याचा आदर केला पाहिजे. आमची भूमिका आहे की डेडलॉक कधी संपणार? निवडून आलेल्या लोकांच्या हातात सत्ता कशी जाणार? त्यामुळे आम्ही हा निर्णय घेतला. सरकार प्रशासक नेमू शकलं असतं. पण तसं केलं नाही, असंही त्यांनी सांगितलं.
दोस्त दोस्त ना राहा
सोशल मीडियाचा वापर करून या निवडणुकीत विखारी प्रचार करण्यात आला. हा संघ एवढा मोठा नाही, पण सोशल मीडियातून तो प्रचंड मोठा असल्याचं दाखवलं जात आहे. काँग्रेस पक्षात असलेल्या धर्मनिरपेक्ष पक्षातील लोकांनी माझ्या मुलाच्या विरोधात जातीयवादी प्रचार केला. सोशल मीडियातून विष कालवलं. सभासदांमध्ये विष कालवलं. दोस्त दोस्त ना राहा असं म्हणावं लागेल, असं ते म्हणाले.
